কিছুদিন পূৰ্বে আলফা (স্বাঃ)ৰ সদস্যৰ গুলীত তিনিচুকীয়া জিলাৰ বৰডুমচা আৰক্ষী চকীৰ ভাৰপ্ৰাপ্ত বিষয়া ভাস্কৰ কলিতাৰ মৃত্যুৰ পিছতে নগাঁও জিলাত আজি পুনৰ জুৱাৰীৰ গুলীত এগৰাকী আৰক্ষী কনিষ্টবল নিহত হয়। নিহত কনিষ্টবলজন অনিল দাস বুলি জানিব পৰা গৈছে।
উল্লেখযোগ্য যে আজি বিয়লি আৰক্ষীৰ দলে এক বিশেষ সূত্ৰৰ পৰা লাভ কৰা তথ্যৰ ভিত্তিত স্থানীয় ডুমডুমী বজাৰত চলি থকা জুৱাৰ আড্ডা উৎখাতৰ বাবে এক অভিযান চলায়।
অভিযানকালত জুৱাৰ আড্ডাথলীত থকা দুৰ্বৃত্তৰ দলে আৰক্ষী দলটোক উদ্দেশ্যি গুলী বৰ্ষণ কৰে। ফলত কনিষ্টবল অনিল দাসৰ শৰীৰত কেইবাটাও গুলী লাগে।
আনহাতে ঘটনা সংঘটিত হোৱাৰ লগে লগে কনিষ্টবলজনক নগাঁও অসামৰিক চিকিৎসালয়ত ভৰ্তি কৰোৱা হয় যদিও কনিষ্টবলগৰাকীয়ে চিকিৎসালয়তে শেষ নিশ্বাস ত্যাগ কৰে। নিহত অনিল দাসৰ ঘৰ নগাঁৱৰ তুলসীমুখত আৰু তেওঁ নৱম আৰক্ষী বেটেলিয়নত কৰ্মৰত আছিল বুলি আৰক্ষীৰ সূত্ৰৰ পৰা জানিব পৰা গৈছে।
ইফালে আৰক্ষীয়ে এই ঘটনাৰ সৈতে জড়িত জালালুদ্দিন নামৰ এটা দুৰ্বৃত্তক আটক কৰিবলৈ সক্ষম হৈছে।
