‘৭০’ সংগঠন আৰু নাই
লোকসভা নিৰ্বাচনৰ ৰাজনৈতিক বা-মাৰলীয়ে ফালি পেলাইছে “৭০ সংগঠন”ৰূপে পৰিচিত নাগৰিকত্ব বিধেয়কবিৰোধী অসমৰ একাংশ সংগঠনৰ ঐক্যবদ্ধ মঞ্চ।
দেখা গৈছে, ৰাজনৈতিক মোকাবিলাৰ দৃঢ় সাধাৰণ কৰ্মসূচীৰ অভাৱৰ ফলতেই বিজেপি উত্থাপিত বিধেয়কখন এতিয়াও বাতিল নোহোৱা অৱস্থাতে নিৰ্বাচনৰ মুখত বলি গৈছে সংগঠনকেইটাৰ ঐক্য।
বিধেয়কৰ পক্ষত আঁকোৰগোজ বিজেপিৰ মিত্ৰজোঁটৰ বিৰুদ্ধে আসন্ন নিৰ্বাচনত ৰাইজক পক্ষ ল’বলৈ মঞ্চটোৰ পৰা জনোৱা আহ্বানেই অনুঘটকৰ কাম কৰিছে বিভাজনত। যুঁজাৰু- দ ফাইটাৰ্ছ নামৰ সংগঠনটোৰ পিছত বুধবাৰে মঞ্চটো ত্যাগ কৰিছে ঐক্য সেনা, অসম নামৰ সংগঠনটোৱে।
“৭০ সংগঠনে কাকো স্পষ্টকৈ ভোট দিবৰ বাবে আহ্বান জনোৱা নাছিল যদিও অসমৰ ৰাইজে ইতিমধ্যে ধাৰণা কৰিছে তেওঁলোক কাৰ সমৰ্থনত আছে। অসমৰ ৰাইজ সজাগ আৰু সচেতন, তেওঁলোকে বিবেকেৰে ভোট দি উপযুক্ত প্ৰাৰ্থীক ভোটদান কৰিব,” যোৱা শুকুৰবাৰে সংবাদমেলযোগে ৭০টা সংগঠনৰ মঞ্চই জনোৱা আহ্বানৰ বিপৰীত অৱস্থানেৰে বুধবাৰে মন্তব্য ঐক্য সেনা, অসমৰ সাধাৰণ সম্পাদক শ্বহিদুল ইছলামৰ।
ইছলামৰ সংগঠনটোৱে এই কথা কোনোপধ্যে “সহ্য” কৰিব নোৱাৰে বুলি মন্তব্য কৰি তেওঁ বিধেয়কখন “সাময়িকভাৱে বাতিল” হোৱা বুলিও উল্লেখ কৰে।
মঞ্চটোৰ মজিয়াৰ পৰা দুই এটা সংগঠনে আগন্তুক নিৰ্বাচনত পোনপটীয়াকৈ ৰাজনৈতিক দলক সমৰ্থন জনোৱা বুলি মন্তব্য কৰি ইয়াৰ বিৰোধিতা কৰিছে ইছলামে।
ঐক্য সেনা অসমে লগতে ঘোষণা কৰে যে তেওঁলোকে নাগৰিকত্ব বিধেয়কৰ বিৰুদ্ধে অৱস্থান লোৱা নিৰ্দলীয় প্ৰাৰ্থীক সমৰ্থন আগবঢ়াব।
মঞ্চটোৱে নিৰ্বাচনত বিজেপিৰ মিত্ৰজোঁট আৰু এ আই ইউ দি এফৰ বিৰুদ্ধে অৱস্থান ল’বলৈ আহ্বান জনোৱা শুকুৰবাৰৰ সংবাদমেলখনত ঐক্য সেনা, অসমৰ নেতৃত্বও উপস্থিত আছিল।