বিশ্বনাথত চৌকত আলী নামৰ মুছলমান সম্প্ৰদায়ৰ এজন লোকক গো মাংস বিক্ৰী কৰাৰ বাবে স্থানীয় লোকে ৰাজপথতে ‘নিৰ্যাতন’ কৰাৰ লগতে গাহৰি মাংস খাবলৈ বাধ্য কৰাৰ ঘটনাটোক মুখ্য মন্ত্ৰী সৰ্বানন্দ সোণোৱালে গৰিহনা দিছে।
ৰাজ্যখনৰ মুখ্য মন্ত্ৰী সোণোৱালে ঘটনাটোক অসমৰ দৰে এখন বহল সমাজৰ বাবে এক দুৰ্ভাগ্যজনক বুলি অভিহিত কৰে।
মুখ্য মন্ত্ৰীয়ে ৰাজ্যৰ আৰক্ষী সঞ্চালক প্ৰধান কুল শইকীয়াক ঘটনাটো সম্পৰ্কত কঠোৰ স্থিতি গ্ৰহণ কৰিবলৈ নিৰ্দেশ দিয়ে যাতে ভৱিষ্যতে আৰু এনে ঘটনা সংঘটিত হ’বলৈ নাপায়।
উল্লেখযোগ্য যে অসম আৰক্ষীয়ে ইতিমধ্যে এই ঘটনাৰ সৈতে জড়িত থকাৰ অভিযোগত ছয়জন লোকক গ্ৰেপ্তাৰ কৰিছে।
ছচিয়েল মিডিয়াত লোকজনে উন্মত্ত লোকসকলক ক্ষমা ভিক্ষা কৰি থকা ভিডিঅ’ ভাইৰেল হোৱাৰ পাছতে ঘটনাটোৱে বাতৰিৰ শিৰোণাম দখল কৰে।
ঘটনাস্থলীৰ পৰা উদ্ধাৰ কৰাৰ পাছত ৬৮ বছৰীয়া চৌকত আলীক এখন চৰকাৰী হাস্পাতালত ভৰ্তি কৰোৱা হৈছিল।
ঘটনাটো সন্দৰ্ভত দুখন সুকীয়া এজাহাৰ দাখিল কৰা হৈছিল আৰু ইয়াৰে এখন চৌকত আলীৰ ভাতৃয়ে দাখিল কৰিছিল।
আৰক্ষীয়ে ঘটনাটোৰ সন্দৰ্ভত তদন্ত অব্যাহত ৰাখিছিল আৰু ভিডিঅ’টোকে ঘটনাটোৰ এক সাক্ষ্য হিচাপে গ্ৰহণ কৰিছে।
বাতৰি অনুসৰি উন্মত্ত লোকৰ দলটোৱে চৌকত আলীক ভাবুকি দিয়াৰ লগতে তেওঁ বাংলাদেশৰ পৰা আহিছে নেকি আৰু গো মাংস বিক্ৰী কৰাৰ অনুজ্ঞা পত্ৰ আছিল নেকি বুলি প্ৰশ্ন কৰিছিল।
ভিডিঅ’টোত উন্মত্ত দলটোৰ এজন লোকে তেওঁক প্ৰশ্ন কৰা দেখা গৈছিল : ‘’তই বাংলাদেশী নেকি? তোৰ নাম এন আৰ চিত আছেনে?’’
ঘটনাটোৰ পাছতে বিশ্বনাথ জিলাত আৰক্ষীয়ে তীক্ষ্ণ নিৰীক্ষণ অব্যাহত ৰাখিছে।
