গুজৰাটৰ ৰাজকোট জিলাত এটা ডাঙৰ দুৰ্ঘটনা সংঘটিত হৈছে। ইয়াত থকা এখন ক’ভিড চিকিৎসালয়ত বৃহস্পতিবাৰে নিশা সংঘটিত হয় এক ভয়ংকৰ অগ্নিকাণ্ডৰ ঘটনা।
এই অগ্নিকাণ্ডটোত পাঁচগৰাকী লোকে প্ৰাণ হেৰুওৱাৰ লগতে এজন গুৰুতৰভাৱে আহত হয়। এই লোকজনৰ অৱস্থা যথেষ্ট সংকটজনক বুলি জানিব পৰা গৈছে।
তথ্য অনুসৰি, যন্ত্ৰপাতিৰ অংশত চৰ্ট চাৰ্কিট হোৱাৰ ফলত হাস্পতালখনত জুই লাগিছিল।
চৰ্ট চাৰ্কিট যদিও ঘটনাৰ প্ৰকৃত কাৰণৰ বিষয়ে অনুসন্ধান চলাবলৈ ইতিমধ্যে গুজৰাটৰ মুখ্য মন্ত্ৰী বিজয় ৰূপানীয়ে নিৰ্দেশ দিছে।
জানিব পৰা মতে এই শোকাৱহ ঘটনাটো বৃহস্পতিবাৰে নিশা একৰ পৰা দুই বজাৰ ভিতৰত সংঘটিত হৈছে।
চহৰখনৰ শিৱানন্দ ক’ভিড চিকিৎসালয়ৰ আই চি য়ু ৱাৰ্ডত জুই লগাত এই ঘটনাটো ঘটে। চিকিৎসালয়খনত ৩৩ গৰাকী ক’ৰ’না ৰোগীৰ চিকিৎসা চলি আছিল।
ঘটনা সংঘটিত হোৱাৰ লগে লগে কিছু লোকক অন্য ৱাৰ্ডলৈ স্থানান্তৰিত কৰা হয় যদিও ৰামসিংভাই, নিতিনভাই বদানী, ৰচিকলাল অগ্ৰাৱত, সঞ্জয় ৰাঠোৰ আৰু কেশুভাই আকবৰী অগ্নিদগ্ধ হৈ মৃত্যুবৰণ কৰে।
উল্লেখ্য যে আগষ্টৰ পৰা এতিয়ালৈকে গুজৰাটৰ চিকিৎসালয়ত অগ্নিকাণ্ডৰ ঘটনা সংঘটিত হোৱা এইটো চতুৰ্থ ঘটনা।
ঘটনাৰ বিষয়ে অৱগত হোৱাৰ লগে লগে অগ্নিনিৰ্বাপক বাহিনীৰ দলটো সেই স্থানত উপস্থিত হৈ উদ্ধাৰ অভিযান আৰম্ভ কৰে।
অগ্নিকাণ্ডৰ ঘটনাৰ পিছৰে পৰা সেই স্থানত অধিক নিৰাপত্তাৰক্ষী নিয়োজিত কৰা হৈছে।
