কৰিমগঞ্জ জিলাৰ পাথাৰকান্দি সমষ্টিৰ অন্তৰ্গত বৈঠাখাল অঞ্চলত আজি পুৱা সংঘটিত এক ভয়ংকৰ পথ দুৰ্ঘটনাত ১০ জন লোক থিতাতে নিহত হৈছে।
আজি পুৱা প্ৰায় ৭.৩০ বজাত কৰিমগঞ্জৰ ৮ নং অসম-ত্ৰিপুৰা ৰাষ্ট্ৰীয় ঘাইপথত এখন অটো-ৰিক্সা আৰু চিমেণ্ট কঢ়িওৱা ট্ৰাকৰ মাজত মুখামুখি সংঘৰ্ষ হয়।
মৃতসকলক দুজা বাই পানীকা, চালু বাই পানীকা, গৌৰৱ দাস পানীকা, শম্ভু দাস পানীকা, লালন গুস্বামী, পূজা গড়, দেৱ গড়, চানু ৰী, মংলাই কৰ্মকাৰ আৰু টুপু কৰ্মকাৰ বুলি চিনাক্ত কৰা হৈছে।
ঘটনাস্থলীত উপস্থিত হোৱা কৰিমগঞ্জৰ আৰক্ষী অধীক্ষক পদ্মনাভ বৰুৱাই সংবাদ মাধ্যমৰ আগত জনায় যে থিতাতে নিহত ব্যক্তিসকলৰ ওপৰিও আন এজন লোকক সংকটজনক অৱস্থাত চিকিৎসালয়লৈ প্ৰেৰণ কৰা হৈছিল।কিন্তু চিকিৎসালয়ত তেওঁৰ মৃত্যু হোৱা বুলি জানিব পৰা গৈছে।
ঘটনাস্থলীত সম্ভাৱ্য যিকোনো অপ্ৰীতিকৰ পৰিস্থিতি প্ৰতিহত কৰিবলৈ সামৰিক বাহিনী মোতায়েন কৰাৰ লগতে ঘটনাটো সন্দৰ্ভত তদন্ত অব্যাহত আছে বুলি জানিবলৈ দিয়ে আৰক্ষী অধীক্ষক গৰাকীয়ে।
আনহাতে পাথেৰকান্দিৰ বিধায়ক কৃষ্ণেন্দু পলে এক ছ’চিয়েল মিডিয়া যোগে ৰাইজক শান্ত হৈ থাকিবলৈ আহ্বান জনাইছে।
এক ফেচবুক পোষ্টত তেওঁ কয়, “মৃতকৰ চিনাক্তকৰণ আৰু আঘাতপ্ৰাপ্ত ব্যক্তিজনক প্ৰাথমিক চিকিৎসাৰ বাবে আৰক্ষী প্ৰশাসনৰ সৈতে যোগাযোগ কৰিছো। অঞ্চলটোত শান্তি বজাই ৰাখিবলৈ সকলোকে অনুৰোধ জনাইছো। বৰ্তমানৰ তথ্য অনুসৰি তেওঁলোক ষঠ পূজা ঘাটৰ পৰা উভতি অহা তীৰ্থযাত্ৰী আছিল।”
শেহতীয়াকৈ মুখ্যমন্ত্ৰী হিমন্ত বিশ্ব শৰ্মাই এই মৰ্মান্তিক দুৰ্ঘটনাত নিহত প্ৰতিজন ব্যক্তিৰ পৰিয়াললৈ ১ লাখ টকাৰ সাহাৰ্য্য ঘোষণা কৰিছে বুলি বিধায়ক কৃষ্ণেন্দু পলে সদৰী কৰিছে।
