অসম বিশেষ আৰক্ষী বিষয়া কল্যাণ সমিতিৰ প্ৰতিবাদ

এছ পি অ’সকলৰ বিভিন্ন সমস্যা সমাধানৰ দাবীত আজি অসম বিশেষ আৰক্ষী বিষয়া (এছ পি অ’) কল্যাণ সমিতিৰ উদ্যোগত এটা ধৰ্ণা কাৰ্য্যসূচী ৰূপায়ণ কৰে এছ পি অ’সকলে। দীৰ্ঘদিন ধৰি তেওঁলোকৰ দাবীৰ প্ৰতি আওকণীয়া মনোভাব প্ৰদৰ্শন কৰি অহাৰ অভিযোগ তোলে আজি ধৰ্ণা কাৰ্য্যসূচীত ভাগ লোৱা এছ পি অ’সকলে। তেওঁলোকে কংগ্ৰেছ চৰকাৰৰ তুলনাত এইখন চৰকাৰে বেছি অৱহেলা কৰাৰো অভিযোগ উত্থাপন কৰে। চৰকাৰে উগ্ৰপন্থীৰ সমস্যা প্ৰবল ৰূপত মূৰ দাঙি থকাৰ সময়ত এছ পি অ’সকলক ব্যৱহাৰ কৰি এতিয়া তেওঁলোকক এলাগী কৰি ৰাখিছে বুলিও অভিযোগ কৰে বিষয়াসকলে।

আজিৰ কাৰ্য্যসূচীৰ অংশস্বৰূপে এছ পি অ’ জোৱানসকলে পল্টনবজাৰস্থিত গুৱাহাটী ৰেইলৱে ষ্টেইশ্যনৰ পৰা আৰম্ভ কৰি উপায়ুক্তৰ কাৰ্য্যালয়লৈ এক প্ৰতিবাদী সমদল উলিয়ায়। তেওঁলোকে চৰকাৰে নিৰ্ধাৰণ কৰি দিয়া ১৪৫টা এছ পি অ’ পদৰ বিপৰীতে সমূহ এছ পি অ’ জোৱানক নিযুক্তিৰ বাবে দাবী তোলে।

ইয়াৰ উপৰি এ টি পি এছ এফৰ দৰেই এছ পি অ’ জোৱান সকলক নিযুক্তি দিবৰ বাবেও চৰকাৰলৈ আহ্বান জনায়। লগতে তেওঁলোকে কয় যে চাকৰিৰ বয়স বেছি হোৱা এছ পি অ’ সকলক বয়সৰ ৰেহাই দি চাকৰিত মকৰল কৰিব লাগে বুলিও কয়। এই দাবীসমূহ অতি শীঘ্ৰেই পূৰ কৰিবলৈ তেওঁলোকে চৰকাৰৰ প্ৰতি আহ্বান জনায়। অন্যথা তেওঁলোকে চৰকাৰৰ বিৰুদ্ধে জংগী আন্দোলন গঢ়ি তোলাৰ হুংকাৰ দিয়ে।