আইন উলংঘকাৰী চালকৰ বিৰুদ্ধে যোৰাবাট থানাৰ যান-বাহন আৰক্ষীৰ অভিযান; তিনিমাহত সংগ্ৰহ চাৰি লাখ টকাৰ জৰিমনা  

গুৱাহাটী মহানগৰীৰ অন্যতম থানা হিচাপে পৰিচিত যোৰাবাট আৰক্ষী থানাৰ লগতে থানাৰ যান-বাহন শাখাই গুৱাহাটী মহানগৰীৰ যান-জঁটৰ সমস্যাটো নিয়ন্ত্ৰণ কৰি অহাত এক গুৰুত্বপূৰ্ণ ভূমিকা গ্ৰহণ কৰি আহিছে। বিশেষকৈ চুবুৰীয়া মেঘালয়কে ধৰি উত্তৰ-পূবৰ সাতোখন ৰাজ্যৰ এক বৃহ সংখ্যক যান-বাহন যোৰাবাট অঞ্চলৰ মাজেৰে চলাচল কৰে।

স্বাভাৱিকতে যোৰাবাট থানাৰ যান-বাহন শাখাৰ গুৰুত্ব গুৱাহাটীৰ আন থানা সমূহতকৈ অধিক। যোৰাবাট থানাৰ যান-বাহন আৰক্ষীৰ ভাৰপ্ৰাপ্ত আৰক্ষী বিষয়া চৈয়দ মুকুট ৰহমানে জানিবলৈ দিয়া মতে শাখাৰ মাত্ৰ ১০ জন আৰক্ষীৰ লোকে আঠমাইলৰ সমীপৰ শ্ৰী শ্ৰী গণেশ মন্দিৰৰ পৰা যোৰাবাট দলঙৰ শ্বিলং সংযোগী পথলৈকে যান-বাহন নিয়ন্ত্ৰণ কৰি আহিছে।

আনহাতে উত্তৰ-পূবৰ ভিতৰতে আটাইতকৈ ব্যস্ততম পথ বুলি পৰিচিত যোৰাবাটৰ মাজেৰে যোৱা জি এচ ৰোড আৰু ৩৭ নং ৰাষ্ট্ৰীয় ঘাইপথত যাতে কোনো চালকে আইন উলংঘা কৰিব নোৱাৰে বা সুৰাপাণ কৰি বাহন চলাব নোৱাৰে তাৰ বাবেও দৈনিক অভিযান চলাই আহিছে।

চলিত বৰ্ষত এতিয়ালৈ মুঠ ২২ জন লোকক সুৰামত্ত অৱস্থাত ধৰা পেলাই তেওঁলোকৰ গাড়ীচালনাৰ অনুজ্ঞাপত্ৰ বাতিল কৰাৰ বাবে কামৰূপ মহানগৰ জিলা পৰিবহন বিষয়া কাৰ্যালয়লৈ প্ৰেৰণ কৰা হয়।

ইয়াৰ উপৰি এই বছৰৰে জানুৱাৰি মাহৰ পৰা মাৰ্চ মাহলৈ যোৰাবাট থানাই ৩ লাখতকৈও অধিক জৰিমনা সংগ্ৰহ কৰা বুলি জানিবলৈ দিয়ে।

ইফালে চলিত বছৰত মবাইল ফোনত কথা পাতি বাহন চলোৱা১১ জন চালক, অতি দ্ৰুত গতিত বাহন চলোৱা ৫ জন চালকক ধৰা পেলায় তেওঁলোকৰ অনুজ্ঞাপত্ৰ বাতিল কৰাৰ বাবে বিভাগীয় কৰ্তৃপক্ষলৈ প্ৰেৰণ কৰে। তাৰোপৰি চলিত বছৰত এই পৰ্যন্ত চাৰিটা দুৰ্ঘটনা সংঘটিত হৈছে আৰু দুৰ্ঘটনাত চাৰিজন লোকৰ মৃত্যু হৈছে।

আনহাতে ভাৰপ্ৰাপ্ত বিষয়াগৰাকীয়ে জানিবলৈ দি কয় যে বাৰিষাৰ দিনত ভূমিস্খলন আৰু পথ ডিভাইডাৰৰ বাবে দৈনিক উক্ত অঞ্চলত ভয়াবহ যান-জঁটৰ সৃষ্টি হয়।