উত্তৰ পূৰ্বাঞ্চলত ১৫টা গুৰুত্বপূৰ্ণ নতুন ৰে’লৱে প্ৰকল্পত কেন্দ্ৰৰ অনুমোদন

উত্তৰ-পূৰ্বাঞ্চলত অতি কমেও ১৫টা গুৰুত্বপূৰ্ণ ৰে’লপথ প্ৰকল্পৰ কাম হাতত লৈছে কেন্দ্ৰ চৰকাৰে। ৫৫,২০৬ কোটি টকা ব্যয়সাপেক্ষ, সৰ্বমুঠ ১,৩৯৫ কি:মি: দৈৰ্ঘ্যৰ ৰে’লপথ নিৰ্মাণ প্ৰকল্পকেইটাত চলিত বৰ্ষৰ মাৰ্চলৈকে ইতিমধ্যে ১৮,৪৭৭ কোটি টকা ব্যয় কৰা হৈছে বুলি আছাম ট্ৰিবিউন কাকতৰ এটা প্ৰতিৱেদনত প্ৰকাশ।

ৰাজ্যসভাত এটা প্ৰশ্নৰ উত্তৰত ৰে’লৱে ৰাজ্যিক মন্ত্ৰী ৰাজেন গোহাঁয়ে কয় যে উক্ত প্ৰকল্পকেইটাৰ ২০১৮-১৯ বৰ্ষৰ বাবে আৰু ইতিমধ্যে সম্পূৰ্ণ হোৱা কেইটামান প্ৰকল্পৰ অৱশিষ্ট  আনুষাংগিক কামৰ বাবে ৪,৪৩০ কোটি টকা ইতিমধ্যে মোকোলাই দিয়া হৈছে।

প্ৰকল্পসমূহ সম্পূৰ্ণ হোৱাৰ ক্ষেত্ৰত পুঁজিৰ উপলব্ধতা, ভূমি অধিগ্ৰহণ, বন আৰু বন্যপ্ৰাণী বিভাগৰ  সেউজ সংকেত, সেৱাৰ পৰিৱৰ্তন, কামৰ ঋতু, ভৌগলিক অৱস্থা, আইন-কানুনগত সমস্যা আৰু অন্যন্য কাৰকে প্ৰভাৱিত কৰে। ৰে’ল মন্ত্ৰী গোহাঁয়ে কয় যে এই কাৰণেই এই প্ৰকল্পসমূহ সমাপ্ত হোৱাৰ এটা নিৰ্দিষ্ট সময়সীমা নিৰ্ধাৰণ কৰাটো অসুবিধাজনক।