দেশৰ আগশাৰীৰ ব্ৰেণ্ড আমূলৰ বিজ্ঞাপনত ভাৰত গৌৰৱ হিমাৰ সাফল্য

দেশৰে প্ৰথম দৌৰবিদৰূপে ৪০০ মিটাৰ দৌৰত বিশ্ব চেম্পিয়নৰ খিতাপেৰে ইতিহাস ৰচনা কৰাৰ পিছতে অসম কন্যা হিমাৰ সাফল্যক লৈ সমগ্ৰ দেশতে উছাহ পৰিলক্ষিত হৈছে।

দেশৰ ৰাষ্ট্ৰপতি, প্ৰধান মন্ত্ৰীৰ লগতে শচীন তেন্দুলকাৰ, অমিতাভ বচ্চনৰ দৰে প্ৰখ্যাত তাৰকাই ভূয়সী প্ৰশংসা কৰা হিমা দাসক দেশৰ সকলো শ্ৰেণীৰ লোকে অভিনন্দন জনাইছে।

ইয়াৰ পিছতে দেশৰ বাণিজ্যিক ক্ষেত্ৰখনতো হিমাৰ সাফল্যই প্ৰভাৱ বিস্তাৰ কৰিছে। দেশৰ আগশাৰীৰ ব্ৰেণ্ড আমূলেও এইবাৰ হিমা দাসৰ সফলতাক লৈ প্ৰকাশ কৰিলে নতুন বিজ্ঞাপন।

কোম্পানীটোৱে ‘দাস পে দছ’ শ্ল’গানেৰে মুকলি কৰিলে নিজৰ এই বিজ্ঞাপন। হিমাৰ জনপ্ৰিয়তাই  এতিয়া আন ক্ৰীড়া তাৰকা বা চিত্ৰ তাৰকাকো ম্লান কৰি পেলাইছে। আমূলৰ এই নতুন বিজ্ঞাপনে ভাৰতৰ দৌৰৰ ৰাণী হিমাৰ সফলতাক তুলি ধৰিবলৈ তাৎক্ষনিকভাৱে সঁহাৰি জনোৱাটোৱে খেলুৱৈগৰাকীৰ দেশৰ ক্ৰীড়া জগতত পেলোৱা প্ৰভাৱৰ কথাকে সূচাইছে।

উল্লেখযোগ্য যে শুকুৰবাৰে ৰাজ্যখনৰ মুখ্য মন্ত্ৰী সৰ্বানন্দ সোণোৱালে হিমা দাসক অসমৰ ক্ৰীড়াৰ ব্ৰেণ্ড এম্বেছেদৰৰূপে ঘোষণা কৰিছে। হিমা দাসক ৰাজ্যিক মৰ্য্যাদাৰে সন্মান জনোৱাৰ লগতে নগদ ধনেৰেও তেওঁক পুৰস্কৃত কৰাৰ কথাও ঘোষণা কৰিছে মুখ্য মন্ত্ৰীগৰাকীয়ে।

হিমা দাসৰ স্বৰ্ণ জয়ক ‘বিৰল কৃতিত্ব’ আৰু ‘অসমবাসীৰ বাবে গৌৰৱৰ কাৰণ’ৰূপে অভিহিত কৰি মুখ্য মন্ত্ৰী সোণোৱালে ‘ভাৰতৰ এইগৰাকী নতুন দৌৰৰ ৰাণীয়ে জাকাৰ্টাত অনুষ্ঠিত হ’বলগীয়া সমাগত এছিয়ান গে’মছটো স্বৰ্ণ পদক অৰ্জন কৰি ৰাজ্যবাসীক গৌৰৱান্বিত’ কৰিব বুলি আশা প্ৰকাশ কৰিছে।