প্ৰাপ্য দৰমহা আদায়ৰ দাবীত অনিৰ্দিষ্টকালীন অনশন কাছাৰ কাগজ কল কৰ্মচাৰীৰ

কাছাৰত অৱস্থিত পাঁচগ্ৰাম কাগজ কল কৰ্মচাৰীসকলক বিগত কেইবা মাহ ধৰি প্ৰাপ্য দৰমহাৰ পৰা বঞ্চিত কৰি ৰখা আৰু কাগজ কলটো পুনৰুজ্জীৱিতকৰণ কৰাৰ দাবীৰে কলটোৰ কৰ্মচাৰীসকলে আজিৰ পৰা অনিৰ্দিষ্টকাললৈ আৰম্ভ কৰিছে এক অনশন কাৰ্যসূচী।

কাছাৰ কাগজ কল শ্ৰমিক সংগঠনৰ সভাপতি মানবেন্দ্ৰ চক্ৰৱৰ্তীয়ে সংবাদ মাধ্যমৰ আগত কয় যে যেতিয়ালৈ চৰকাৰে আমাৰ ন্যায্য দাবীসমূহ তথা কাগজ কলটো আনুষ্ঠানিকভাৱে পুনৰুজ্জ্বীৱিতকৰণৰ ব্যৱস্থা গ্ৰহণ নকৰে তেতিয়ালৈ আমাৰ এই প্ৰতিবাদ চলি থাকিব।

উল্লেখ্য যে সোমবাৰে কাগজ কলটোৰ ঠিকাভিত্তিক কৰ্মচাৰীসকলে বিভিন্ন দাবী সম্বলিত পোষ্টাৰ, বেনাৰ আদি লৈ চহৰৰ মাজমজিয়াৰে এটা বৃহৎ সমদল উলিয়াই অঞ্চলটো পৰিভ্ৰমণ কৰি পুনৰ কাগজ কলটোৰ সন্মুখত উপস্থিত হয়। ইফালে সমদলৰ সময়ত প্ৰতিবাদকাৰীসকলে তেওঁলোকৰ প্ৰাপ্য দৰমহা আদায় দিয়া, চাকৰিৰ নিৰাপত্তা প্ৰদান কৰা আদি বিভিন্ন শ্লোগানেৰে পৰিৱেশ উত্তাল কৰি তোলে।

মানবেন্দ্ৰ চক্ৰৱৰ্তীয়ে গভীৰ দুখ প্ৰকাশ কৰি কয় যে কাগজ কলটোৰ ঠিকাভিত্তিক কৰ্মচাৰীসকলে বিগত ২৪ মাহ ধৰি তেওঁলোকৰ প্ৰাপ্য মজুৰিৰ পৰা বঞ্চিত হৈ আছে। যোৱা ৩০ এপ্ৰিলতে এই কৰ্মচাৰীসকলক তেওঁলোকৰ অনাদায় ধন আদায় দিয়াৰ কথা ঘোষণা কৰিছিল। কিন্তু তেওঁলোকৰ দাবী অসাৰত পৰিণত হৈছে।