স্বায়ত্ত পৰিষদক ষষ্ঠ অনুসূচীত অন্তৰ্ভুক্তিৰ পদক্ষেপ গ্রহণ কৰিছে চৰকাৰে

বৰ্তমান ছেটেলাইট পদ্ধতিত গঠন হোৱা স্বায়ত্ত শাসিত পৰিষদসমূহক ষষ্ঠ অনুসূচীত অন্তৰ্ভুক্ত কৰাৰ পদক্ষেপ গ্ৰহণ কৰিছে চৰকাৰে।

তিৱা, ৰাভা, মিচিং, দেউৰী, সোণোৱাল কছাৰী আৰু ঠেঙাল কছাৰী স্বায়ত্ত্ব পৰিষদক ষষ্ঠ অনুসূচীত অন্তৰ্ভুক্ত কৰাৰ বাবে চৰকাৰে এখন কেবিনেট উপ-সমিতি গঠন কৰিব।

পূৰ্বৰ কংগ্ৰেছ চৰকাৰে ইয়াৰ দ্বিতীয়টো কাৰ্যকালত গঠন কৰা কেবিনেট উপ-সমিতিয়ে ২০১০ ৰ ১৭ জুলাইত দাখিল কৰা প্ৰতিবেদনখন চৰকাৰে ছবছৰ ধৰি পেলাই ৰাখিছিল।

উক্ত কেবিনেট উপ-সমিতিয়ে ছটা জনগোষ্ঠীৰ বাবে গঠন কৰা সুকীয়া স্বায়ত্ত্ব পৰিষদ কেইখনক ষষ্ঠ অনুসূচীত অন্তৰ্ভুক্ত কৰাৰ বিষয়ত কেন্দ্ৰীয় চৰকাৰৰ লগত যোগাযোগ কৰিবলৈ ভৈয়াম জনজাতি আৰু অন্যান্য পিছপৰা শ্ৰেণী কল্যাণ বিভাগক পৰামৰ্শ দিছিল।

কেবিনেট উপ-সমিতিৰ উক্ত পৰামৰ্শ সম্পৰ্কত চৰকাৰে কোনো ব্যৱস্থা গ্ৰহণ নকৰাৰ ফলত সংশ্লিষ্ট জনগোষ্ঠীকেইটাৰ নেতৃত্বই অসন্তুষ্টি প্ৰকাশ কৰি আহিছিল।

উক্ত স্বায়ত্ত্ব শাসিত পৰিষদকেইখনক ষষ্ঠ অনুসূচীত অন্তৰ্ভুক্ত কৰাৰ বিষয়টো পুনৰ চালি জাৰি চোৱাৰ বাবে ৰাজ্য চৰকাৰে এখন কেবিনেট উপ-সমিতি গঠন কৰিব বুলি জানিব পৰা গৈছে।

পূৰ্বৰ কেবিনেট উপ-সমিতিয়ে পঞ্চায়তীৰাজ ব্যৱস্থাৰ আৰ্হিত তিনি তৰপীয়া অৰ্থাৎ গাঁও পঞ্চায়তৰ দৰে গাঁও পৰিষদ আৰু আঞ্চলিক পঞ্চায়তৰ দৰে আঞ্চলিক পৰিষদ গঠনৰো পৰামৰ্শ দিছিল যদিও সেয়া চৰকাৰে কাৰ্যকৰী নকৰিলে।

বৰ্তমান অকল স্বায়ত্ত্ব পৰিষদৰ বাবেহে নিৰ্বাচন অনুষ্ঠিত হয়। তদুপৰি, যিকেইটা জনগোষ্ঠীৰ স্বায়ত্ত্ব পৰিষদ গঠন কৰা হৈছে সেই জনগোষ্ঠীৰ লোক সংশ্লিষ্ট পৰিষদৰ এলেকাৰ বাহিৰতো বাস কৰি আছে আৰু তেওঁলোক পৰিষদীয় ব্যৱস্থাৰ আওতাত পৰা নাই।

স্বায়ত্ত্ব পৰিষদ এলেকাৰ বাহিৰত থকা সেই জনগোষ্ঠীৰ লোকসকলোকো সামৰি ৰাজ্য চৰকাৰে স্বায়ত্ত্ব পৰিষদ গঠন কৰিব বিচাৰিছে। এই ক্ষেত্ৰত ভৈয়াম জনজাতি আৰু অন্যান্য পিছপৰা শ্ৰেণীৰ কল্যাণ বিভাগে সংশ্লিষ্ট জিলাৰ উপায়ুক্তসকলৰ পৰা প্ৰতিবেদন বিচাৰিছে বুলি এক সূত্ৰই জনাইছে।