অবৈধ নাগৰিক হিচাপে চিহ্নিত ৫,৯৭০ক মেঘালয়ৰ পৰা বহিস্কাৰ

১৯৭২ চনৰ পৰা  চলিত বৰ্ষৰ মাৰ্চ মাহলৈকে সুদীৰ্ঘ  ৪৬ বছৰৰ সময়চোৱাত   অবৈধ নাগৰিক হিচাপে চিহ্নিত আৰু অভিযুক্ত হোৱা ৫,৯৭০ গৰাকীক  মেঘালয়ৰ পৰা বহিস্কাৰ কৰা হৈছে। এই ক্ষেত্ৰত সেই লোকসকল কোন দেশৰ নাগৰিক তাৰ কোনো বিচাৰ কৰা হোৱা নাই।

বিধানসভাৰ এটা ‘তৰাচিহ্ন বিহীন’ প্ৰশ্নৰ উত্তৰত মুখ্য মন্ত্ৰী কনৰাড চাংমাই কয় যে ১৯৭২ চনৰ পৰা ২০১৮ চনলৈকে অবৈধ নাগৰিক হিচাপে প্ৰতিপন্ন হোৱা ৫,৯৭০ গৰাকী অবৈধ নাগৰিকক কাৰাবাসৰ ম্যাদ উকলি যোৱাৰ পাছত ৰাজ্যখনৰ পৰা বহিস্কাৰ কৰা হৈছে।

২০১০ চনত ১৩৩ গৰাকী, ২০১১ চনত ১৫৬ গৰাকী, ২০১২ চনত ২৬৮ গৰাকী, ২০১৩ চনত ১৬৯ গৰাকী, ২০১৪ চনত ৭৪ গৰাকী, ২০১৫ চনত ৭১ গৰাকী, ২০১৬ চনত ১১৫ গৰাকী, ২০১৭ চনত ৩৪ গৰাকী আৰু এই বছৰৰ মাৰ্চলৈকে মাত্ৰ ৪ গৰাকীক অবৈধ নাগৰিক হিচাপে চিহ্নিত আৰু অভিযুক্ত কৰা হৈছে।

মুখ্য মন্ত্ৰী চাংমাই কৈছে যে এইসকলৰ ভিতৰত ২৫গৰাকীক এতিয়াও ৰাজ্যখনৰ বিভিন্ন কাৰাগাৰত বন্দী কৰি ৰখা হৈছে।