অসমত ভ্ৰাম্যমাণ আমাৰ দোকানৰ জৰিয়তে গ্ৰাহকক ঘৰতে যোগান ধৰা হ’ব প্ৰয়োজনীয় সামগ্ৰী

মূলত: ৰাজহুৱা বিতৰণ ব্যৱস্থাটোক অধিক শক্তিশালী কৰাৰ উদ্দ্যেশ্য সোণোৱাল চৰকাৰৰ বাজেটত লোৱা হৈছে কেইবাটাও গুৰুত্বপূৰ্ণ প্ৰস্তাৱ।

বিশেষকৈ ৰাজ্যবাসীয়ে যাতে তেওঁলোকৰ নিত্য প্ৰয়োজনীয় সামগ্ৰী সমূহ ঘৰতে লাভ কৰিবলৈ সক্ষম হয় তাৰ বাবে উদ্যোগ গ্ৰহণ কৰিছে অসম চৰকাৰে।

অসমৰ বিত্তমন্ত্ৰী হিমন্ত বিশ্ব শৰ্মাই অসম বিধানসভাত বাজেট উত্থাপন কৰি কৈছিল যে শীঘ্ৰে ৰাজ্যখনত ভ্ৰাম্যমাণ আমাৰ দোকানৰ ব্যৱস্থা কৰা হ’ব। য’ত এখন ই-ৰিক্সাত ভ্ৰাম্যমাণ দোকান এখনে গ্ৰাহকক চাহিদা অনুপাতে যোগান ধৰিব প্ৰয়োজনীয় সামগ্ৰী।

ইয়াৰ জৰিয়তে গ্ৰাহকৰ সুবিধা হোৱাৰ লগতে স্থানীয় যুৱক-যুৱতী সকলেও কৰ্মসংস্থাপন লাভ কৰিবলৈ সক্ষম হ’ব বুলি আশা প্ৰকাশ কৰে বিত্তমন্ত্ৰী গৰাকীয়ে।

প্ৰসংগক্ৰমে উল্লেখযোগ্য যে ৰাজ্য চৰকাৰে প্ৰধানমন্ত্ৰীৰ উজ্জলা আঁচনিৰ অধীনত প্ৰায় ৯.৫ লাখ মহিলাক ঘৰুৱা ৰন্ধন গেছৰ সংযোগ প্ৰদান কৰিছে।

আনহাতে দাৰিদ্ৰ্য সীমাৰেখাৰ তলত বসবাস কৰা অন্যান্য হিতাধীকাৰী সকলে যাতে এই আঁচনিৰ দ্বাৰা যাতে লাভাৱান্বিত হয় তাৰ বাবে বাজেটত প্ৰায় ১২৮.৭০ কোটি টকা ধাৰ্য কৰা হৈছে বুলি সদনক অৱগত কৰে মন্ত্ৰীগৰাকীয়ে।