অসম ৰাজ্যিক পৰিবহন নিগমৰ ৬৮ খন বাছ চাৰি বছৰৰ বাবে চুক্তিত ল’লে অ’এন জি চিয়ে

যোৱা বছৰ অসম ৰাজ্যিক পৰিবহন নিগম (এ এছ টি চি) আৰু অ’ এন জি চিৰ মাজত স্বাক্ষৰিত হোৱা সহযোগিতা চুক্তিৰ ৰূপায়নৰ পদক্ষেপ হিচাপে শনিবাৰে নাজিৰাৰ অ’ এন জি চিৰ অসম সম্পদৰ মুখ্য কাৰ্যালয়ে আনুষ্ঠানিকভাৱে ৬৮ খন বাছ অ’ এন জি চিৰ সেৱাত অন্তৰ্ভুক্ত কৰিছে।

সূত্ৰসমূহে জনোৱা মতে অ’ এন জি চিৰ অসম সম্পদে মুঠতে ২৯৭ খন বিভিন্ন বাহন অ’ এন জি চিৰ অধীনত চাৰিবছৰ চুক্তি ভিত্তিত চলোৱাৰ বাবে গ্ৰহণ কৰিছে।

এই প্ৰক্ৰিয়াৰ অংশ হিচাপেই অ’ এন জি চিয়ে এ এছ টি চিৰ পৰা ৬৮ খন বাছ লোৱাৰ সিদ্ধান্ত গ্ৰহণ কৰিছে। অ’ এন জি চি কৰ্তৃপক্ষৰ এই পদক্ষেপৰ ফলত অসম ৰাজ্যিক পৰিবহন নিগম উপকৃত হ’ব।

তদুপৰি, অ’এনজিচিয়ে এশৰো অধিক মজলীয়া আৰু সৰু বাহন শিৱসাগৰ আৰু চৰাইদেও জিলাৰ শিক্ষিত নিৱনুৱা যুৱকৰ পৰা চুক্তি ভিত্তিত গ্ৰহণ কৰিছে। এইটোৱে নিশ্চিতভাৱে যুৱকসকলক উপকৃত কৰিব।

অ’এনজিচিয়ে প্ৰতি বছৰে তৈল খনন আৰু আন সেৱাৰ বাবে প্ৰায় ৪০০ বাহন গ্ৰহণ কৰে আৰু কোম্পানীটোৱে সাধাৰণতে এই গাড়ীসমূহ স্থানীয় লোকৰ পৰাই লয় যাতে স্থানীয় অৰ্থনীতিৰ উন্নত হয়।