অৰুণাচলৰ মুখ্য মন্ত্ৰী পেমা খাণ্ডুৰ কেন্দ্ৰীয় ৰে’ল মন্ত্ৰী পীয়ুষ গোৱেলক সাক্ষাৎ

অৰুণাচলৰ মুখ্য মন্ত্ৰী পেমা খাণ্ডুৱে আজি নতুন দিল্লীত কেন্দ্ৰীয় ৰে’ল মন্ত্ৰী পীয়ুষ গোৱেলক সাক্ষাৎ কৰে আৰু অৰুণাচলত ৰে’লৱে প্ৰকল্পৰ কাম খৰতকীয়াভাৱে আগবঢ়াই নিয়াৰ বাবে অনুৰোধ জনায়। অৰুণাচলত এটা শক্তিশালী ৰেলৱে নেটৱৰ্ক গঢ়ি তুলিবলৈ মুখ্য মন্ত্ৰীগৰাকীয়ে কেন্দ্ৰীয় ৰে’ল মন্ত্ৰীগৰাকীক আহ্বান জনায়।

উল্লেখ্য যে অৰুণাচলত ১১টা ৰে’লৱে প্ৰকল্পৰ কাম বিভিন্ন পৰ্যায়ত চলি আছে। সেই কেইটা হৈছে ভালুকপুং-টেংগা-টাৱাং, চিলাপথাৰ-বামে-আলো (৯২ কি:মি:, পাছিঘাট-তেজু-পৰশুৰামকুণ্ড-ৰূপাই (২২৫ কি:মি:), ইটাখোলা-ছেইজোছা (১৮ কি:মি:), দুমদুমা-নামচাই-ৱাক্ৰো (৯৬ কি:মি:), ডাংৰি-ৰোয়িং (৬০ কি:মি:), দেওমালী-নাহৰকটীয়া (২০ কি:মি:), লেখাপানী-খৰছাং-মিয়াও-নামপং-ইউ কামলাং (দেবাং)(৭৫ কি:মি:), শিমলগুৰি কানুবাৰী হৈ তিনিচুকীয়া-পাছিঘাট (৩০০ কি:মি:), মাৰ্ঘেৰিটা দেওমালী (৩১ কি:মি:), ঈৰু মুৰ্কংছেলেক-পাছিঘাট (২৬.১৫ কি:মি:)। এইকেইটাৰ ভিতৰত শেষৰ দুয়াৰ জৰীপ সম্পূৰ্ণ হৈছে বাকীকেইটাৰ জৰীপ ২০১৯ৰ আগে আগে সমাপ্ত হ’ব।

ইয়াৰে ভিতৰত মিছামাৰী-ভালুকপু-টাৱাং ৰে’লপথটো আটাইতকৈ কঠিন আৰু দেশৰ ভিতৰতে সৰ্বোচ্চ স্থানত অৱস্থিত ৰে’লপথ হ’ব। এই ৰে’লপথচোৱাত ২ ১খন দলং আৰু ১৪৫ কি:মি: সুৰংগ থাকিব।

বিত্ত বিভাগৰো দায়িত্বত থকা গোয়েলক মুখ্য মন্ত্ৰীগৰাকীয়ে ৰাজ্যখনত এটা বিমানঘাটীৰ প্ৰয়োজনীয়তাৰ কথাও অৱগত কৰে আৰু হোলংগীত নিৰ্মাণ হ’বলগীয়া গ্ৰীনফিল্ড বিমানঘাটী নিৰ্মাণৰ বাবে আগতীয়া পুঁজি মঞ্জুৰ কৰাৰ বাবে অনুৰোধ জনয়।

খা্ডুৱে সোমবাৰে অসামৰিক বিমান পৰিবহণ মন্ত্ৰী জয়ন্ত সিনহাক সাক্ষাৎ কৰি নিষ্পত্তি নোহোৱা বিষয়সমূহৰ ওপৰত আলোচনা কৰে। অসামৰিক বিমান পৰিবহণ মন্ত্ৰী জয়ন্ত সিনহাই প্ৰধান মন্ত্ৰীৰ ‘সব উড়ে, সব জুড়ে’ৰ লক্ষ্যত সাৰোগত কৰি উত্তৰ-পূৰ্বাঞ্চলত শক্তিশালী আৰু ব্যয়বহুল বিমান নেটৱৰ্ক গঢ়ি তোলাৰ ক্ষেত্ৰত প্ৰতিশ্ৰুতিবদ্ধতাৰ কথা দোহাৰে।

গোৱেলে মুখ্য মন্ত্ৰী পেমা খাণ্ডুৰ অনুৰোধলৈ সন্মতি জ্ঞাপন কৰি কয় যে যোগাযোগ হৈছে আৰুণাচলৰ সম্পূৰ্ণ বিকাশৰ চাবিকাঠি আৰু তেওঁৰ মন্ত্ৰ্যালয়ে অৰুণাচলক বিকাশৰ দিশত আগুৱাই নিবলৈ যথা সম্ভৱ প্ৰচেষ্টা কৰি যাব।