অৰুণাচল প্ৰদেশ চৰকাৰে ৰাজ্যখনৰ দুই স্থানক বিশ্ব ঐতিহ্য ক্ষেত্ৰ হিচাপে স্বীকৃত হোৱাটো বিচাৰিছে

অৰুণাচল প্ৰদেশ চৰকাৰে ৰাজ্যখনৰ দুখন পৰ্যটন ক্ষেত্ৰক ইউনেস্কোৰ বিশ্ব ঐতিহ্য ক্ষেত্ৰৰ তালিকাত অন্তৰ্ভুক্ত হোৱাটো বিচাৰিছে। ৰাজ্যিক গৱেষণা বিভাগৰ এগৰাকী বিষয়াৰ উদ্ধৃতি দি সংবাদ সংস্থাই এই বাতৰি প্ৰকাশ কৰিছে।

ৰাজ্যখনৰ নামনি সোৱনশিৰি জিলাৰ জিৰ’ উপত্যকাৰ আপাটানি সাংস্কৃতিক শোভা আৰু পশ্চিম কামেং জিলাৰ এখন সুৰক্ষিত গাওঁ (দুৰ্গ) থেমবাঙ ডিজঙক ইউনেস্কোৰ বিশ্ব ঐতিহ্য ক্ষেত্ৰৰ সম্ভাৱ্য তালিকাত অন্তৰ্ভুক্ত কৰা হৈছে আৰু এতিয়া চূড়ান্ত তালিকাত অন্তৰ্ভুক্তিৰ বাবে বিবেচনা কৰি থকা হৈছে।

ৰাজ্য চৰকাৰে এই দুই স্থানত ব্যাপক মেৰামতি তথা সংৰক্ষণৰ কাম কৰি আছে যাতে বিশ্ব ঐতিহ্য ক্ষেত্ৰৰ চূড়ান্ত তালিকাত অন্তৰ্ভুক্তিৰ বাবে থকা সকলো চৰ্ত পূৰণ কৰিবলৈ সক্ষম হয়।

পশ্চিম কামেং জিলাৰ থেমবাঙ ডিজঙ সুৰক্ষিত গাওঁখন ৩.২ একৰ ভূমি জুৰি আছে আৰু উত্তৰ তথা দক্ষিণ দিশে দুখন গেট আছে। প্ৰাচীন আৰু ঐতিহাসিক গাঁথনিৰে আবৃত ডিজঙ (দুৰ্গ)টো মনপা জনজাতিসকলৰ পৰম্পৰাগত বাসস্থান।

পঞ্চায়ত ব্যৱস্থাৰ দ্বাৰা পৰিচালিত গাওঁখনত বাসিন্দাসকলৰ কাৰণে নিজৰ বুলি কোনো সম্পত্তি নাই। পৰম্পৰাগত কাঠৰ ভাস্কৰ্যকে ধৰি আলংকাৰিক সা-সামগ্ৰী, চিত্ৰশিল্প আৰু পাণ্ডুলিপিৰে ডিজঙৰ দেৱাল খচিত হৈ আছে।

আপাটানি সাংস্কৃতিক নৈসৰ্গিক শোভাও ইয়াৰ জনগোষ্ঠীটোৰ মাজত প্চলিত একক কৃষি পদ্ধতিৰ বাবে বিশ্ব ঐতিহ্য ক্ষেত্ৰৰ সম্ভাৱ্য তালিকাত স্থান পাইছে।

ইয়াৰ খেতিপথাৰত পৰ্যাপ্ত গুৰুত্বপূৰ্ণ জলাশয়ৰ সংৰক্ষণ তথা সুষমভাৱে ইয়াৰ পানী উপত্যকালৈ বৈ যাব পৰা ব্যৱস্থা আছে যাতে ৰাইজৰ প্ৰয়োজন পূৰণ কৰিব পাৰে।

এই জনজাতিসকলে আইন-শৃংখলা ৰক্ষাৰ বাবে এখন গাওঁ পৰিষদ নিৰ্বাচন কৰে আৰু ইয়াক ‘বুলিয়ান’ বুলি কয়।

২০১৪ চনৰ এপ্ৰিলত অৰুণাচলৰ এটাকে ধৰি দেশৰ ২২টা স্থানক ইউনেস্কোৰ বিশ্ব ঐতিহ্য ক্ষেত্ৰৰ সম্ভাৱ্য তালিকাত অন্তৰ্ভুক্ত কৰা হৈছিল।

অৰুণাচল চৰকাৰে বৰ্তমান ৰাজ্যখনৰ এই দুই স্থানক ইউনেস্কোৰ বিশ্ব ঐতিহ্য ক্ষেত্ৰৰ চূড়ান্ত তালিকাত নাম অন্তৰ্ভুক্তিৰ বাবে সকলো প্ৰকাৰে প্ৰচেষ্টা অব্যাহত ৰাখিছে।