আৰক্ষীৰ দ্বাৰা সাংবাদিকক আক্ৰমণৰ ঘটনা সন্দৰ্ভত অসম আৰু আৰু মিজোৰামৰ শীৰ্ষ আৰক্ষীক মানৱধিকাৰ আয়োগৰ জাননী
ৰাষ্ট্ৰীয় মানৱাধিকাৰ আয়োগৰ তৰফৰ পৰা আজি অসম আৰু মিজোৰামৰ আৰক্ষী সঞ্চালক প্ৰধানলৈ এখন জাননী প্ৰেৰণ কৰি অসম মিজোৰাম সীমান্তৰ দাঁতিত অৱস্থিত কোলাছিব জিলাৰ জফাই বৈৰবি এলেকাত ৮ আৰু ১০ মাৰ্চত অসম আৰক্ষীৰ দ্বাৰা লাঠি চাৰ্জ আৰু শাৰীৰিকভাৱে অপদস্ত কৰা ঘটনাৰ বিতং প্ৰতিৱেদন বিচাৰিছে।
চাৰি সপ্তাহৰ ভিতৰতে প্ৰতিৱেদন দাখিল কৰাৰ বাবে ৰাষ্ট্ৰীয় মানৱ অধিকাৰ আয়োগে আৰক্ষীৰ শীৰ্ষ বিষয়া দুগৰাকীক নিৰ্দেশ দিছে। অভিযোগকাৰীৰ পৰা ঘটনা সন্দৰ্ভত অৱগত হোৱাৰ পিছত আয়োগে এই নিৰ্দেশনা জাৰী কৰিছে ।
উল্লেখ্য যে মিজো জিৰলাই পাওল নামৰ ছাত্ৰ সংগঠনটো আৰু অসম আৰক্ষীৰ মাজত উত্তেজনাময় পৰিস্থিতিৰ উদ্ভৱ হোৱাত গ্ৰাউণ্ড জিৰ’ প্ৰতিৱেদন প্ৰস্তুত কৰাৰ বাবে তাত সাংবাদিকসকল উপস্থিত হৈছিল আৰু আৰক্ষীয়ে সাংবাদিকসকলৰ ওপৰত লাঠি চাৰ্জ কৰিছিল। অভিযোগ উত্থাপিত হোৱা মতে আৰক্ষীয়ে গুলিচালনাও কৰিছিল।
অভিযোগনামাত উল্লেখ কৰা আছে যে সাংবাদিকৰ পৰিচয়ত্ৰ দেখুওৱা সত্বেও আৰক্ষীৰ লোকে তেওঁলোকক বেয়াকৈ মাৰধৰ কৰিছিল য’ত মহিলা সাংবাদিককে ধৰি বহুতো সাংবাদিক গুৰুতৰভাৱে আহত হৈছিল।