আৰক্ষী বিষয়া, গল্পকাৰ কুলধৰ শইকীয়া হ’ব অসমৰ পৰৱৰ্তী আৰক্ষী সঞ্চালকপ্ৰধান

কুলধৰ শইকীয়াক অসম আৰক্ষী ( Assam Police )ৰ নতুন সঞ্চালকপ্ৰধানৰূপে নিযুক্তি দিয়া হৈছে। ১৯৮৫ বৰ্ষৰ আই পি এছ শইকীয়া বৰ্তমান আৰক্ষীৰ আইন-শৃংখলা শাখাৰ বিশেষ সঞ্চালকপ্ৰধানৰূপে নিযুক্ত হৈ আছে। শইকীয়াই ২০১৯ চনত অৱসৰ ল’ব।

দিল্লী স্কুল অৱ ইকনমিক্স, পেনছিলভেনিয়া ষ্টে’ট ইউনিভাৰ্ছিটি, আই আই টি গুৱাহাটীৰ প্ৰাক্তন শিক্ষাৰ্থী শইকীয়া অসমীয়া সাহিত্যৰ এজন জনাজাত গল্পকাৰ। গল্পৰ স্বীকৃতি হিচাপে শইকীয়াই সাহিত্য একাডেমি বঁটাও লাভ কৰিছে।

১৯৫৯ চনত জন্মগ্ৰহণ কৰা শইকীয়াই দিল্লী স্কুল অৱ ইকনমিক্সৰ পৰা স্নাতকোত্তৰ উপাধি লোৱাৰ পিছত কিছুকাল দিল্লীৰ হিন্দু কলেজত অৰ্থনীতি বিষয়ৰ শিক্ষকতা কৰিছিল। ১৯৮৫ চনত ভাৰতীয় আৰক্ষী সেৱাত যোগ দিয়াৰ পূৰ্বে নতুন দিল্লীত পৰিকল্পনা আয়োগত ভাৰতীয় অৰ্থনৈতিক সেৱাৰ বিষয়া হিচাপে কাম কৰা শইকীয়াই ভাৰতীয় ৰে’লটো কিছুকালৰ বাবে ট্ৰেফিক সেৱা বিষয়া হিচাপে কাম কৰিছিল।

ফুলব্ৰাইট ফেল’ হিচাপে শইকীয়াই ২০০০-০১ চনত পেনছিলভেনিয়া ষ্টে’ট ইউনিভাৰ্ছিটিত ‘Leadership and Management and a Research Program on Community Development and management of resources’ শীৰ্ষক এক পাঠ্যক্ৰম অধ্যয়ন কৰিছিল। কিছুকালৰ বাবে তেওঁ বিশ্ব বেংকৰ পৰামৰ্শদাতা হিচাপেও কাম কৰিছিল।

ভিতৰুৱা জনজাতীয় গাওঁসমূহত সামাজিক অন্ধবিশ্বাস, অৰ্থনৈতিক বিচ্ছিন্নতা আৰু উগ্ৰপন্থাৰ বিৰুদ্ধে যুঁজাৰ বাবে আৰম্ভ কৰা ‘প্ৰজেক্ট প্ৰহৰী’ নামৰ সামাজিক উন্নয়নমুখী প্ৰকল্পৰ বাবে তেওঁ উচ্চ প্ৰশংসা লাভ কৰিছিল। আৰক্ষী সেৱাৰ ক্ষেত্ৰত আগবঢ়োৱা উৎকৃষ্ট বৰঙনিৰ বাবে তেওঁ দুবাৰ ৰাষ্ট্ৰপতিৰ আৰক্ষী পদক লাভ কৰিছিল। গুৱাহাটী মহানগৰৰ আৰক্ষী মুৰব্বী হিচাপে ১৯৯৬ চনৰ জুলাইত তেওঁ নাগৰিক সমিতি নামে সামূহিক শান্তিৰক্ষী মডেলটো আৰম্ভ কৰিছিল।

অসমৰ পৰৱৰ্তী আৰক্ষী সঞ্চালকপ্ৰধান বাচনি আৰু নিযুক্তিৰ বাবে ষ্টে’ট ছিকিয়ৰিটি কমিছনে যোৱা সোমবাৰে ৰাজ্য চৰকাৰক কিছুসংখ্যক আৰক্ষী বিষয়াৰ নাম দাখিল কৰিছিল। বৰ্তমানৰ আৰক্ষী মুৰব্বী মুকেশ সহায়ে অহা ৩০ এপ্ৰিলত অৱসৰ গ্ৰহণ কৰিব।

শইকীয়াৰ পৰিবাৰ লীনা শৰ্মাও অসমীয়া লেখিকা তথা ভাৰতীয় ৰে’ল সেৱাৰ বিষয়া। শৰ্মা নতুন দিল্লীৰ ৰে’লৱে’ তথ্য কেন্দ্ৰৰ মহাপ্ৰবন্ধক। তেওঁলোকৰ একমাত্ৰ পুত্ৰই বৰ্তমান দিল্লী বিশ্ববিদ্যালয়ত এম ফিল কৰি আছে।