ইম্ফলৰ ডি এম মহাবিদ্যালয় চৌহদত পঞ্চম ৰাজ্যিক একুৱাৰিয়াম প্ৰদৰ্শনী আৰু পুষ্পমেলা আৰম্ভ
ইম্ফলৰ ডি এম মহাবিদ্যালয় চৌহদত থকা মণিপুৰ বিজ্ঞান একুৱাৰিয়ামত পঞ্চম ৰাজ্যিক পৰ্যায়ৰ একুৱাৰিয়াম আৰু পুষ্প প্ৰদৰ্শনী আৰম্ভ হৈছে।
এই প্ৰদৰ্শনীৰ উদ্দেশ্য হৈছে বিভিন্ন মাছৰ প্ৰজাতিৰ চৰিত্ৰ অধ্যয়ন কৰা, ৰাজ্যখনৰ মাছ সংৰক্ষণ কৰা আৰু জনসাধাৰণক স্থানীয় মাছৰ প্ৰজাতিসমূহৰ সন্দৰ্ভত সচেতন কৰা আৰু ৰাইজৰ অৱসৰ বিনোদনৰ ব্যৱস্থা কৰা।
দেওবাৰে মণিপুৰৰ উপ মুখ্য মন্ত্ৰী য়ুমনাম জয়কুমাৰে পাঁচ দিন ধৰি চলি থাকিবলগীয়া প্ৰদৰ্শনী আৰু পুষ্প প্ৰদৰ্শনীখন আনুষ্ঠানিকভাৱে মুকলি কৰে। ২৪ মাৰ্চত এই প্ৰদৰ্শনীখনৰ সামৰণি পৰিব।
অনুষ্ঠানটোত বক্তব্য ৰাখি উপ মুখ্য মন্ত্ৰীজনে কয় যে মণিপুৰ ছাইন্স এণ্ড টেকন’লজি কাউঞ্চিলে স্থানীয় আৰু আমদানিকৃত মাছ পালনৰ বিষয়ে ৰাইজক সচেতন কৰাৰ বাবে গ্ৰহণ কৰা পদক্ষেপ খুব সুন্দৰ আৰু ইয়ে স্থানীয় বিৰল আৰু বিলুপ্তপ্ৰায় মাছৰ প্ৰজাতিসমূহ সংৰক্ষণ আৰু জনপ্ৰিয় কৰাৰ ক্ষেত্ৰত সহায়ক হ’ব।
তেওঁ কয়, ‘বাসভূমি ধ্বংস কৰি পেলোৱা বাবে বহুতো স্থানীয় প্ৰজাতিৰ ফুল আৰু জীৱ-জন্তু আজি দেখা নোপোৱা হৈ আহিছে’।
ফুল খেতি সম্পৰ্কে জয়কুমাৰে কয় যে এই অভিৰুচিয়ে মানুহক দুঃচিন্তা মুক্ত কৰে আৰু আনন্দ দিয়ে। আমি বিৰাট পৰিমাণে ফুলৰ বাগিচা পাতিব নোৱাৰোঁ যদিও নিজৰ ঘৰৰ বাগিচাত ফুলৰ বাগিচা পাতিব পাৰোঁ। ইয়ে আমাৰ মন সতেজ কৰি তুলিব।‘
মণিপুৰ ছাইন্স এণ্ড টেকন’লজি কাউঞ্চিলৰ সঞ্চালক থ সুৰেন্দ্ৰনাথে জানিবলৈ দিছে প্ৰতিদিন দিনৰ ১১ বজাত এই প্ৰদৰ্শনীখন ৰাইজৰ বাবে মুকলি কৰা হ’ব আৰু নিশা ৭ বজাত বন্ধ কৰা হ’ব। এই প্ৰদৰ্শনীখন ২৪ মাৰ্চলৈকে চলি থাকিব।
উল্লেখ্য যে মণিপুৰ ছাইন্স একুৰিয়ামত ২৫ বিধ স্থানীয় আৰু আমদানিকৃত মাছৰ প্ৰজাতি পোহা হৈছে।