উত্তৰ-পূব পৰিষদ : অধ্যক্ষৰ পদত কেন্দ্ৰীয় গৃহ মন্ত্ৰী, অনুমোদন কেবিনেটৰ

উত্তৰ পূব পৰিষদৰ অধ্যক্ষৰূপে কেন্দ্ৰীয় গৃহ মন্ত্ৰীক দায়িত্ব দিয়া হৈছে। প্ৰধান মন্ত্ৰী নৰেন্দ্ৰ মোদীৰ অধ্যক্ষতাত বহা  ১৩ জুনৰ কেবিনেট বৈঠকে এই অনুমোদন জনায়।

পূৰ্বে পৰিষদৰ অধ্যক্ষৰ দায়িত্বত থকা দ’নাৰ মন্ত্ৰী জিতেন্দ্ৰ সিঙে এতিয়াৰ পৰা উপাধ্যক্ষৰূপে দায়িত্ব চম্ভালিব।

‘দ’নাৰ মন্ত্ৰ্যালয়ে (Ministry of Development of North Eastern Region) কেন্দ্ৰীয় গৃহ মন্ত্ৰীক উত্তৰ পূব পৰিষদৰ অধ্যক্ষ পদৰ বাবে কৰা প্ৰস্তাৱ প্ৰধান মন্ত্ৰী নৰেন্দ্ৰ মোদীৰ অধ্যক্ষতাত বহা কেন্দ্ৰীয় কেবিনেটে অনুমোদন জনাইছে,’ পি আই বিৰ এক বিবৃতিত প্ৰকাশ।

উত্তৰ-পূবৰ আঠোখন ৰাজ্যৰ ৰাজ্যপাল আৰু মুখ্য মন্ত্ৰীসকল পূৰ্বৰ দৰেই পৰিষদৰ সদস্য হিচাপে থাকিব।

উত্তৰ-পূব পৰিষদৰ এই পুনৰগঠনে পৰিষদখনক উত্তৰ পূৰ্বাঞ্চলত অধিক কাৰ্য্যকৰী কৰি তোলাত সহায় কৰিব বুলি কেন্দ্ৰীয় চৰকাৰে দাবী কৰিছে।

উত্তৰ-পূবৰ ৰাজ্যসমূহৰ মাজত ভাৰসাম্য ৰক্ষা আৰু সমন্বয় সাধনৰ লক্ষ্যৰে উত্তৰ-পূব পৰিষদ আইন, ১৯৭১ৰ অধীনত উত্তৰ-পূব পৰিষদ গঠন কৰা হৈছিল।