উন্নাও আৰু কাঠুৱাৰ ধৰ্ষণকাণ্ডৰ প্ৰতিবাদত অসম মহিলা প্ৰদেশ কংগ্ৰেছৰ ‘ক’লা দিৱস’

উন্নাও আৰু কাঠুৱাত সংঘটিত ধৰ্ষণকাণ্ড তথা মহিলাৰ ওপৰত বৰ্ধিত অপৰাধৰ প্ৰতিবাদত সমগ্ৰ দেশজুৰি কংগ্ৰেছে পালন কৰা ‘ক’লা দিৱস’ৰ অংশ হিচাপে আজি গুৱাহাটীস্থিত ৰাজীৱ ভবনত অসম মহিলা প্ৰদেশ কংগ্ৰেছে এক প্ৰতিবাদী কাৰ্যসূচী বাহিৰ কৰে।

তেওঁলোকে অভিযোগ কৰে যে, দেশ তথা ৰাজ্যত মহিলাৰ বিৰুদ্ধে অপৰাধজনিত ঘটনা দৈনিক বৃদ্ধি পাই অহাৰ পিছতো বিজেপি চৰকাৰে এই ক্ষেত্ৰত নিৰ্লিপ্ত ভূমিকা গ্ৰহণ কৰি আহিছে।

চৰকাৰৰ এই নিৰ্লিপ্ততাৰ বিৰুদ্ধে মহিলা প্ৰতিবাদকাৰীসকলে হাতে হাতে মোদী চৰকাৰ বিৰোধী প্লে কাৰ্ড লৈ উলিওৱা প্ৰতিবাদী সমদলত প্ৰতিবাদকাৰীসকলে ধৰ্ষণকাৰীক ফাঁচি দিয়ক, বিজেপি নেতাসকলৰ পৰা মহিলাসকলক বচাওক, বিজেপি নেত্ৰী স্মৃতি ইৰাণী এতিয়া ক’ত গ’ল? ইত্যাদি শ্ল’গান দিয়ে।

প্ৰতিবাদী সমদলত অংশগ্ৰহণ কৰি অসম মহিলা প্ৰদেশ কংগ্ৰেছ কমিটিৰ সভানেত্ৰী শ্বেহনাজ ইয়াছমিন হকে কয় যে সৰ্বানন্দ সোণোৱাল চৰকাৰ শাসনলৈ অহাৰ পিছৰে পৰা অসমত মহিলাৰ ওপৰত হত্যা, ধৰ্ষণ ইত্যাদিৰ মাত্ৰা বৃদ্ধি পাইছে।

ইয়াৰোপৰি তেওঁ মোদী চৰকাৰৰ ‘বেটী বচাও বেটী পঢ়াও’ অভিযানক সম্পূৰ্ণৰূপে অৰ্থহীন আখ্যা দি কয়, ‘বিজেপিৰ নেতা ধৰ্ষণকাণ্ডৰ সৈতে জড়িত হোৱাৰ পিছতো নৰেন্দ্ৰ মোদীয়ে বৰ্তমানলৈকে মৌনতা অবলম্বন কৰি আছে। ধৰ্ষণকাৰীৰ পৰা বেটীসকল বাচিলেহে আমি বেটীক পঢ়াব পাৰিম। গতিকে আপুনি প্ৰকৃতাৰ্থত বেটীক বচাওক, নহ’লে শাসনভাৰৰ পৰা সোনকালে আঁতৰি যাওক।’

প্ৰতিবাদকাৰীসকলে উন্নাও আৰু কাঠুৱাত সংঘটিত হোৱা ধৰ্ষণৰ চি বি আই তদন্ত দাবী কৰাৰ লগতে ধৰ্ষণকাৰীক ফাঁচি দিয়াৰ বাবেও মোদী চৰকাৰক দাবী জনায়।