এ পি এছ ছি কেলেংকাৰি : মুখ্য মন্ত্ৰী, তদন্তকাৰী বিষয়ালৈ প্ৰশ্ন অখিল গগৈৰ
এ পি এছ ছি কেলেংকাৰি ঘটনা সন্দৰ্ভত আজি ১৯গৰাকী ৰাজপত্ৰিত বিষয়াক তদন্তকাৰী আৰক্ষীয়ে গ্ৰেপ্তাৰ কৰাৰ পিছতে এই এ পি এছ ছি কেলেংকাৰিৰ বিৰুদ্ধে পুনৰ সৰৱ হৈ পৰিছে অখিল গগৈ।
এ পি এছ ছি কেলেংকাৰী ঘটনাৰ তদন্তৰ সন্দৰ্ভত সৰৱ হৈ পৰা কৃষক নেতা গৰাকীয়ে প্ৰশ্ন উত্থাপন কৰি কয় যে, ‘আৰপি শৰ্মাই উল্লেখ কৰাৰ দৰে কেৱল নিৰ্দ্দিষ্ট কেইজনমান লোকক টাৰ্গেট কৰি লোৱা হৈছে কিয়?’
তাৰোপৰি কৃষক নেতা গৰাকীয়ে কয় যে, ‘কিয় হিমন্ত বিশ্ব শৰ্মা, সমুজ্জ্বল কুমাৰ ভট্টাচাৰ্য্য আৰু বিজেপিৰ বিধায়ক গুৰুজ্যোতি দাস, সুমিত্ৰা পাটীৰ আৰু চিকিমিকি তালুকদাৰৰ দৰে নেতাৰ প্ৰাৰ্থীসমূহক গ্ৰেপ্তাৰ কৰা হোৱা নাই?’
লগতে কৃষক নেতা গৰাকীয়ে অসমৰ মুখ্য মন্ত্ৰী আৰু তদন্তকাৰী বিষয়াসকলৰ পৰা এই প্ৰশ্নকেইটাৰ উত্তৰ বিচাৰে।
আনহাতে অখিল গগৈয়ে সাংসদ আৰ পি শৰ্মাৰ জীয়ৰীক গ্ৰেপ্তাৰ কৰাৰ পাছত সাংসদজনে লগে-লগে পদত্যাগ কৰা উচিত বুলি তেওঁ দাবী জনোৱাৰ লগতে এ পি এছ চি কেলেংকাৰীত ধন যোগান ধৰা কাৰণে তথা ৰাজনৈতিক হস্তক্ষেপ কৰাৰ কাৰণে অনতিবিলম্বে সাংসদ আৰপি শৰ্মাক গ্ৰেপ্তাৰ কৰাৰো দাবী উত্থাপন কৰে।
ইফালে তেওঁ ‘ৰাকেশ পালৰ দিনৰ এপিএছছি নিযুক্তিৰ ৮০ শতাংশতকৈ অধিক নিযুক্তিত কেলেংকাৰী আছিল।’ বুলি উল্লেখ কৰি কয় যে ‘দুৰ্ভাগ্যৰ কথা তদন্তকাৰী বিষয়াসকলে মাত্ৰ কেইজনমান বিষয়াকহে গ্ৰেপ্তাৰ কৰিছে। আৰু কেলেংকাৰীৰে চাকৰি লোৱা বহু বিষয়াই এতিয়াও বিষয়াৰ পদ গ্ৰহণ কৰি আছে।’
গতিকে কৃষক নেতাজনে অতি শীঘ্ৰে ২০১৩ আৰু ২০১৫ চনৰ এপিএছছি পৰীক্ষাৰ যিসকলে নিযুক্তি পাইছিল, তেওঁলোকৰ চাকৰি বাতিল কৰাৰ বাবে দাবী জনায়।
আনকি তেওঁ নতুনকৈ পৰীক্ষাসমূহ অনুষ্ঠিত কৰিবৰ বাবে চৰকাৰক দাবী জনোৱাৰ উপৰিও ‘কিয় এতিয়ালৈকে এই পৰীক্ষাকেইটা বাতিল কৰা হোৱা নাই এই প্ৰশ্নৰ উত্তৰ মুখ্য মন্ত্ৰীয়ে জনাব লাগে।’ বুলিও উল্লেখ কৰে।
আনহাতে, সমগ্ৰ এ পি এছ ছি কেলেংকাৰীৰ চিবিআই তদন্তৰ দাবী জনাই তেওঁ এই কেলেংকাৰীত জড়িত সকলক উপযুক্ত শাস্তি দিয়াৰ ব্যৱস্থা গ্ৰহণ কৰিবলৈও দাবী জনায়।
অৱশ্যে কৃষক নেতাগৰাকীয়ে এ পি এছ চি কেলেংকাৰীৰ সৈতে জড়িত নতুনকৈ ১৯ জন বিষয়াক আজি গ্ৰেপ্তাৰ কৰাৰ বাবে তদন্তকাৰী বিষয়াকেইজনক ধন্যবাদো জ্ঞাপন কৰে।