ওদালগুৰিত উলহ মালহেৰে উদযাপন গাঁওৰক্ষী বাহিনীৰ ৬৯ সংখ্যক প্ৰতিষ্ঠা দিৱস

সোমবাৰে ওদালগুৰি জিলাৰ খাওৰাং গোৰ্খা নাট্য ৰংগমঞ্চত বিভিন্ন কাৰ্যসূচীৰে অসম গাঁওৰক্ষী বাহিনীৰ ৬৯ সংখ্যক প্ৰতিষ্ঠা দিৱসৰ দ্বিতীয় দিনটো উলহ মালহেৰে পালন কৰা হয়। গাওঁৰক্ষী বাহিনীৰ প্ৰতিনিধি সকলক সম্ভাষণ জনায় ওদালগুৰি জিলাৰ আৰক্ষী অধীক্ষক ৰাজবীৰ সিঙে। সিঙে কয় যে যদি গাঁও সমূহত শান্তি-শৃংখলা তথা সৌহাৰ্দ্যপূৰ্ণ বাতাবৰণে বিৰাজ কৰে তেন্তে ৰাষ্ট্ৰ এখনৰো কল্যাণ সাধন হোৱাটো নিশ্চিত।

প্ৰতিষ্ঠা দিৱস উপলক্ষে আয়োজক মণ্ডলীয়ে প্ৰকাশ কৰি উলিওৱা স্মৰণিকা ‘জাগ্ৰত প্ৰহৰী’ উন্মোচন কৰে আৰক্ষী অধীক্ষক সিঙে।

উন্মোচন কাৰ্যসূচী সম্পন্ন হোৱাৰ পিছতে মুকলি সভাখন আৰম্ভ হয়। মতিলাল ৰাভাই সভাপতিত্ব কৰা সভাখনত আৰম্ভণি ভাষণ প্ৰদান কৰে গাঁওৰক্ষী বাহিনীৰ অৱসৰপ্ৰাপ্ত চক্ৰ সংগঠক মোহন ভট্টৰায়ে।

ওদালগুৰি জিলা সমিতিৰ গাওঁৰক্ষী বাহিনীৰ সাধাৰণ সম্পাদক ৰোহিত চেত্ৰীৰ তত্বাৱধানত উক্ত সভাখন অনুষ্ঠিত হয়।

গাঁওৰক্ষী বাহিনীৰ অসম ৰাজ্যিক সমন্বয় সমিতিৰ সম্পাদক যতিন ভাদ্ধাই মহিলা গাঁওৰক্ষী বাহিনী গঠন কৰাৰ পোষকতা কৰে সভাখনতে।

তেওঁ লগতে কয় যে অঞ্চলটোত শান্তি-শৃংখলা অটুট থকাৰ মূলতে হ’ল গাওঁৰক্ষী বাহনী আৰু আৰক্ষীৰ মাজত থকা সু সম্পৰ্ক।

দুদিনীয়াকৈ অনুষ্ঠিত হোৱা প্ৰতিষ্ঠা দিৱসৰ শুভাৰম্ভণি হৈছিল চাফাই কাৰ্যসূচীৰে। ইয়াৰ পিছতে খেম প্ৰসাদ অধিকাৰীয়ে প্ৰতিনিধি সভাৰ শুভাৰম্ভণি কৰে। মুখ্যদ্বাৰ উন্মোচন কৰে অখিল সাহাই।

এই প্ৰতিষ্ঠা দিৱসতে বড়ো, চানথালি, গাৰো আৰু নেপালী সম্প্ৰদায়ৰ বিভিন্ন কলা-কৃষ্টি পৰিৱেশন কৰা হয়।