কলিয়াবৰৰ কুঁৱৰীটোলত দুদিনীয়া কাৰ্যসূচীৰে সদৌ অসম ছাত্ৰ সন্থাৰ কেন্দ্ৰীয় বিষ্ণু ৰাভা দিৱস

অসমৰ সমাজ-ৰাজনীতি-সংস্কৃতিৰ পুৰোধা ব্যক্তি কলাগুৰু বিষ্ণুপ্ৰসাদ ৰাভাক তেওঁৰ মৃত্যু দিৱস ২০ জুনত সমগ্ৰ অসমবাসীয়ে সুঁৱৰি আহিছে। এইবাৰো কাইলৈ ৰাজ্যখনৰ বিভিন্ন ঠাইত বিষ্ণু ৰাভা দিৱসৰ আয়োজন কৰাৰ বাতৰি আহিছে। কলিয়াবৰৰ কুঁৱৰীটোলত সদৌ অসম ছাত্ৰ সন্থাৰ উদ্যোগত আৰু কলিয়াবৰবাসীৰ সহযোগত কেন্দ্ৰীয়ভাৱে আৰু দুদিনীয়া বৰ্ণাঢ্য কাৰ্য্যসূচীৰে আজিৰ পৰাই বিষ্ণু ৰাভা দিৱস পতা হৈছে। দিৱস উদযাপন স্থলী গান্ধীপথাৰ বিভিন্ন কাৰ্য্যসূচীৰে উখল-মাখল হৈ থকাৰ লগতে কলাগুৰুৰ কালজয়ী গীতেৰে মুখৰিত হৈ আছে।

আজি পুৱা মুখ্য তোৰণ উন্মোচন, মঞ্চ, কাৰ্যালয় উদ্বোধনৰ পিছতে অনুষ্ঠিত হয় সদৌ অসম ভিত্তিত বিষ্ণু ৰাভাৰ গীতৰ প্ৰতিযোগিতা। আয়োজকৰ তৰফৰ পৰা জনোৱা মতে, আজি নিশালৈ অনুষ্ঠিত হ’ব বিষ্ণু ৰাভাৰ গীতৰ আধাৰত নৃত্য প্ৰতিযোগিতা।

আনহাতে কাইলৈ, অৰ্থাৎ বুধবাৰে অনুষ্ঠিতব্য বিভিন্ন অনুষ্ঠানত অংশগ্ৰহণ কৰিব আছুৰ উপদেষ্টা ড০ সমুজ্জ্বল কুমাৰ ভট্টাচাৰ্য, সাধাৰণ সম্পাদক লুৰিণজ্যোতি গগৈকে ধৰি আছুৰ কেন্দ্ৰীয় নেতৃবৰ্গই।

নিশাৰ সাংস্কৃতিক অনুষ্ঠানত সুৰৰ মূৰ্চনা তুলিব নাহিদ আফ্ৰিন, নীল আকাশ, অপূৰ্ব বেজবৰুৱা আৰু জিনা ৰাজকুমাৰীয়ে।

ৰাভা দিৱসৰ কাৰ্য্যসূচীৰ মাজত কলাগুৰুৰ সাংস্কৃতিক অৱদান আৰু তেওঁৰ জীৱনৰ ওপৰত আলোকপাতৰ প্ৰয়াস কৰিছে বুলি উদ্যোগতাই জানিবলৈ দিছে।