কুকুৰা যুঁজক কেন্দ্ৰ কৰি বৰহাটত এজন লোক নিহত

উচ্চতম ন্যায়ালয়ৰ দ্বাৰা যিকোনো  জন্তুৰ যুঁজৰ ওপৰত নিষেধাজ্ঞা আৰোপ কৰাৰ পিছতো চৰাইদেউ জিলাৰ বৰহাটত আয়োজন কৰা এক কুকুৰা যুঁজক কেন্দ্ৰ কৰি সৃষ্টি হোৱা কাজিয়াৰ ফলত এজন যুৱকে প্ৰাণ হেৰুৱাব লগীয়া হয়। প্ৰাপ্ত তথ্য মতে মাঘ বিহু উপলক্ষে আয়োজন কৰা কুকুৰা যুঁজত বৰহাট চাহ বাগিচাৰ ১৮ নং লাইনৰ  সন্তোষ সোনা (২৬) আৰু মিণ্টু দীপৰ মাজত কিবা কথাত কাজিয়াৰ সূত্ৰপাত হয়। স্থানীয় প্ৰত্যক্ষদৰ্শীয়ে জনোৱা মতে কাজিয়াখনে পিছলৈ ভয়ংকৰ ৰূপ ধাৰণ কৰাৰ পিছত মিণ্টুয়ে এটা কুকুৰাৰ ঠেঙত বান্ধি থোৱা সৰু ছুৰীখনেৰে সন্তোষক ডিঙিত উপৰ্যুপৰি  আক্ৰমণ কৰাত সন্তোষৰ ঘটনাস্থলীতে মৃত্যু হয়। উক্ত ঘটনা সংঘটিত হোৱাৰ পিছতে ঘটনাস্থলীত আৰক্ষী উপস্থিত হৈ হত্যাকাৰী মিণ্টু দীপক গ্ৰেপ্তাৰ কৰাৰ লগতে সন্তোষ সোনাৰ মৃতদেহ মৰোণত্তৰ পৰীক্ষাৰ বাবে প্ৰেৰণ কৰে।