গভীৰ নিদ্ৰাত সোণোৱাল চৰকাৰ, বাংলাদেশীৰ বাবে মেঘালয়ৰ পিছত এইবাৰ দুৱাৰ বন্ধ নাগালেণ্ডৰ

ধৰ্মৰ ভিত্তিত বিদেশীক দেশৰ নাগৰিকত্ব প্ৰদান কৰিবলৈ বিজেপি চৰকাৰে উত্থাপন কৰা নাগৰিকত্ব বিধেয়কক লৈ সোণোৱাল কেবিনেটত আলোচনা কৰাত স্বয়ং মুখ্য মন্ত্ৰীয়ে হস্তক্ষেপ কৰাৰ বিপৰীতে নাগালেণ্ড চৰকাৰে এই সন্দৰ্ভত ঘোষণা কৰিছে স্পষ্ট স্থিতি।

বিতৰ্কিত বিধেয়কখনক লৈ আজি পৰ্য্যন্ত সোণোৱাল চৰকাৰে কেবিনেট বৈঠক অনুষ্ঠিত নকৰাৰ বিপৰীতে আজি ৬ জুনত কেবিনেট বৈঠক পাতি এই বিধেয়কৰ ক্ষেত্ৰত স্পষ্ট সিদ্ধান্ত লৈছে নাগালেণ্ড চৰকাৰে।

‘নাগাৰ স্বাৰ্থৰ বিৰুদ্ধে যোৱা নাগৰিকত্ব আইনৰ যিকোনো ধৰণৰ সংশোধনৰে বিৰোধিতা কৰিব’ বুলি ঘোষণা কৰি নাগালেণ্ড চৰকাৰে জাৰি কৰা বিবৃতিত ‘বিষয়টো ভাৰত চৰকাৰৰ সৈতে আলোচনা কৰা হ’ব’ বুলি সদৰী কৰিছে।

লক্ষণীয়ভাৱে নাগালেণ্ডটো বিজেপি দল শাসনাধিষ্ঠ নেইফিঅ’ ৰিঅ’ চৰকাৰৰ মিত্ৰদল।

নাগালেণ্ড চৰকাৰৰ এই স্পষ্ট স্থিতিৰ বিপৰীতে যোৱা ১ জুনত হোৱা সোণোৱাল কেবিনেটত বিষয়টো আলোচনা কৰাত স্বয়ং মুখ্য মন্ত্ৰী সোণোৱালেই হস্তক্ষেপ কৰিছিল।

আনহাতে বিজেপিও মিত্ৰজোঁটৰ অংশীদাৰ হিচাপে থকা মেঘালয় চৰকাৰে শ্বিলঙত যুটীয়া সংসদীয় সমিতিৰ শুনানিৰ পূৰ্বেই বিতৰ্কিত বিধেয়কখনৰ স্পষ্ট বিৰোধিতা কৰিছিল।

তাৎপৰ্য্যপূৰ্ণভাৱে অসম আজিকোপতি সাংবিধানিকভাৱে সুৰক্ষিত নোহোৱাৰ বিপৰীতে সংবিধানৰ ৩৭১ (এ’) ধাৰাৰ অধীনত নাগালেণ্ড সাংবিধানিকভাৱে সুৰক্ষিত আৰু ৰাজ্যখনত আন্তঃ ৰাজ্যিক পাৰপত্ৰ প্ৰযোজ্য।

উল্লেখযোগ্য যে বিতৰ্কিত বিধেয়কখনৰ বিৰুদ্ধে অসমত হোৱা জনজাগৰণলৈ উত্তৰ-পূবৰ ছাত্ৰ সংগঠনসমূহৰ ঐক্যমঞ্চ নেছ’ৰ অংশীদাৰ নাগা ছাত্ৰ সন্থাকে ধৰি নাগা ট্ৰাইবেল কাউন্সিল আৰু জনতা দল (য়ু)এও সমৰ্থন ঘোষণা কৰিছিল।