গুৱাহাটী চিকিৎসা মহাবিদ্যালয় কেন্সাৰ প্ৰতিষ্ঠানৰ প্ৰথম বৰ্ষপূৰ্তি বক্তৃতা প্ৰদান কৰিব মুম্বাইৰ টাটা মে’মৰিয়েলৰ প্ৰাক্তন সঞ্চালক ডঃ পি বি দেশায়ে

গুৱাহাটী চিকিৎসা মহাবিদ্যালয়ৰ ৰাজ্যিক কেন্সাৰ প্ৰতিষ্ঠানৰ প্ৰথম বৰ্ষপূৰ্তি উপলক্ষে প্ৰতিষ্ঠানটোৱে বিশেষ বক্তৃতানুষ্ঠান, চিকিৎসা শিক্ষা কৰ্মশালা আৰু এটা কেন্সাৰ সজাগতা দৌৰৰ আয়োজন কৰিছে।

শনিবাৰে ‘The Dazzling Brilliance of Science – Then, Now and Into the Future’ শীৰ্ষক প্ৰথম বৰ্ষপূৰ্তি বিশেষ বক্তৃতা আগবঢ়াব মুম্বাইৰ টাটা মে’মৰিয়েল কেন্দ্ৰৰ প্ৰাক্তন সঞ্চালক, পদ্ম ভূষণ ডঃ পি বি দেশায়ে।

বক্তৃতানুষ্ঠানটোত অসমৰ স্বাস্থ্য মন্ত্ৰী হিমন্ত বিশ্ব শৰ্মা মুখ্য অতিথি হিচাপে উপস্থিত থাকিব।

প্ৰথম বৰ্ষপূৰ্তি উদযাপনৰ প্ৰথম দিনা ১৬ ফেব্ৰুৱাৰিত চিকিৎসক আৰু ছাত্ৰ-ছাত্ৰীসকলৰ মাজত এক অবিৰত চিকিৎসা শিক্ষা কাৰ্য্যসূচী (CME) অনুষ্ঠিত হ’ব।

ৰাষ্ট্ৰীয় পৰ্য্যায়ৰ কেন্সাৰ বিশেষজ্ঞ ডঃ ৰাজেশ মিস্ত্ৰি, ডঃ তপন শইকীয়া, ডঃ সিদ্ধাৰ্থ লস্কৰ, ডঃ ৰৱি কান্নান আৰু ডঃ মান্দাৰ নাদকাৰ্নীয়ে এই কাৰ্য্যসূচীত কেন্সাৰ চিকিৎসা সম্পৰ্কীয় বৈজ্ঞানিক আলোচনাত ভাগ ল’ব।

আনহাতে শনিবাৰে পুৱা ৬.৩০ বজাত চিকিৎসা প্ৰতিষ্ঠানটোৰ পৰা উলুবাৰী গৈ পুনৰ প্ৰতিষ্ঠানটোলৈকে এক ‘কেন্সাৰ সজাগতা দৌৰ’ আয়োজন কৰিছে।

কেন্সাৰ চিকিৎসালয়খনৰ ভাৰপ্ৰাপ্ত অধীক্ষক ডঃ কমলাকান্ত ভূঞাই এন ই নাওক জনোৱা অনুসৰি, ‘কেন্সাৰ যে নিৰাময়্সাধ্য সেই কথাটো আমি ৰাইজক জনাব খুজিছো। মানুহৰ মাজত কেন্সাৰক লৈ সজাগতা তেনেই কম। ইয়ালে চিকিৎসা ল’বলে অহা বেছি ভাগেই কেন্সাৰ বহু আগবঢ়া অৱস্থাত আহে যেতিয়া তেওঁলোক আৰোগ্য হোৱা কঠিন হৈ পৰে।’