গোলাঘাটৰ অতিৰিক্ত উপায়ুক্ত তথা গ্ৰমোন্নয়নৰ ভাৰপ্ৰাপ্ত প্রকল্প সঞ্চালক উৎপল দলেৰ বিৰুদ্ধে পুনৰ সৰৱ কৃষক মুক্তি

গ্ৰামোন্নয়নৰ বিভিন্ন শিতানৰ ধন আত্মসাত কৰাৰ অভিযোগত গোলাঘাটৰ অতিৰিক্ত উপায়ুক্ত তথা জিলাখনৰ গ্ৰামোন্নয়ন প্ৰাধিকৰণৰ ভাৰপ্ৰাপ্ত প্ৰকল্প বিষয়া উৎপল দলেৰ বিৰুদ্ধে বোকাখাত আৰক্ষী থানাত একাধিক গোচৰ পঞ্জীয়ন কৰাৰ পাছত বিষয়া গৰাকীৰ বিৰুদ্ধে পুনৰ সৰৱ হৈছে কৃষক মুক্তি সংগ্ৰাম সমিতি ।

দেওবাৰে সংবাদ মাধ্যমলৈ প্ৰেৰণ কৰা এক বিবৃত্তিত কৃষক মুক্তি সংগ্ৰাম সমিতিৰ গোলাঘাট জিলা সমিতিয়ে উৎপল দলে বোকাখাত সমষ্টিৰ দুসুতিমুখ গাঁও পঞ্চায়ততো গ্ৰামোন্নয়নৰ ধন আত্মসাত কৰা বুলি অভিযোগ উত্থাপন কৰিছে ৷

অভিযোগ মতে দুসুতিমুখ পঞ্চায়তৰ অন্তৰ্গত বৰবিল পাঠৰী গাঁও সংযোগী দলঙৰ নামত বিগত সময়ত ৫ লাখ টকা আৱন্টন হৈছিল। ধন আৱন্টনৰ পাছত দলঙৰ কামৰ বাবে নিবিদাও আহ্বান কৰা হৈছিল ৷ কিন্তু যিজন ব্যক্তিয়ে নিবিদা লাভ কৰে উক্ত ব্যক্তিজনক কাম কৰিবলৈ নিদি প্ৰকল্প সঞ্চালক উৎপল দলেই তেওঁৰ নিকট আত্মীয় দিব্য মৰাঙকহে দলং নিৰ্মাণৰ কামত লগায় যদিও দলং নিৰ্মাণ কিন্তু নহ’ল বৰঞ্চ দলং নিৰ্মানৰ আবন্টিত সমুদায় ধন উৎপল দলে আৰু দিব্য মৰাঙে মিলি আত্মসাৎ কৰে বুলি অভিযোগ উত্থাপন কৰিছে কৃষক মুক্তি সংগ্ৰাম সমিতিয়ে।

কৃষক মুক্তি সংগ্রাম সমিতিৰ মতে গোলাঘাটৰ প্ৰকল্প সঞ্চালক গৰাকীৰ বিভিন্ন কেলেংকাৰী ফাদিল হোৱাৰ পাছত তেওঁৰ নিকট আত্মীয় দিব্য মৰাঙে দলঙৰ কাম পুনৰ আৰম্ভ কৰা বুলি সংগঠনটোক স্থানীয়লোকে জনাইছে বুলিও বিবৃতিটোত উল্লেখ কৰিছে।

কৃষক মুক্তি সংগ্ৰাম সমিতিৰ অভিযোগ মতে প্রকল্প সঞ্চালক উৎপল দলেৰ নিকট আত্মীয় দিব্য মৰাঙে পঞ্চায়ত খনৰ হাইলেণ্ড নিৰ্মাণৰ নামতো ব্যাপক কেলেংকাৰী সংঘৰ্টিত কৰিছে । কৃষক সংগঠনটোৰ মতে ২০১৬ – ১৭ বৰ্ষত পঞ্চায়ত খনৰ পাখিলী হাইলেণ্ডৰ নামত ২৩,২২,৩৮২ টকা এনৰেগা আঁচনিৰ নামত আবন্টন হৈছিল। আৱন্টন হোৱাৰ পাছত প্ৰকল্প বিষয়া উৎপল দলেৰ নির্দেশ ক্রমে তেওঁৰ নিকট আত্মীয় দিব্য মৰাঙে ট্রেক্টৰ , ডাম্পাৰ লগাই উক্ত কাম আৰম্ভ কৰি জব কাৰ্ড হিতাধিকাৰীৰ পৰা আগতীয়াকৈ ৫ পৰা ১০ হাজাৰ টকা আদায় লয় ৷  সংগঠনটোৰ  মতে উক্ত কামত দিব্য মৰাং নামৰ ব্যক্তিজনৰ জৱকার্ডত দিব্য মৰাঙ আৰু তেওঁৰ পত্নীৰ নামত  কাম কৰা দেখুৱাই বিভাগীয় মাষ্টাৰ ৰোলৰ জড়িয়তে হাজাৰ হাজাৰ টকা আত্মসাৎ কৰিছে ।

কৃষক মুক্তি সংগ্রাম সমিতিৰ গোলাঘাট জিলা সমিতিৰ কাৰ্যকৰী সভাপতি মহেন মৰাং, সম্পাদক ৰতন দাৱ স্বাক্ষৰিত এই বিবৃতিত গোলাঘাট জিলা উপায়ুক্তক এই আঁচনিত সমুহৰ তদন্ত কৰিবৰ বাবে আহ্বান জনোৱাৰ লগতে এই সম্পৰ্কত অচিৰেই দেৰগাঁও থানাত এজাহাৰ দাখিল কৰিব বুলিও জনাইছে ৷