গৌৰীসাগৰত সংঘটিত ভয়ংকৰ পথ দুৰ্ঘটনাত নিহত এজন আৰক্ষীৰ লোক

শিৱসাগৰ জিলাৰ গৌৰীসাগৰ থানাৰ অন্তৰ্গত চাৰিং আলি কেঁকুৰিৰ ৩৭ নং ৰাষ্ট্ৰীয় ঘাইপথৰ ওপৰত আজি পুৱা সংঘটিত হোৱা এক ভয়ংকৰ পথ দুৰ্ঘটনাত এজন লোক ঘটনাস্থলীতে নিহত হয়।

জানিব পৰা মতে শিৱসাগৰৰ পৰা যোৰহাট অভিমুখী পঞ্জীয়ন বিহীন এখন বগা ৰঙৰ মাৰুটি আৰটিগা গাড়ীৰ বিপৰীত দিশৰ পৰা অহা চাউলভৰ্তি এখন ট্ৰাক (পঞ্জীয়ন নং এ.এছ.০৩-এ.চি. ৮৩৯৮) ৰ মাজত মুখামুখি সংঘৰ্ষ হয়। দুৰ্ঘটনাটোত আৰটিগা গাড়ীখনৰ চালক তথা গৰাকী নয়নমণি কোঁচৰ ঘটনাস্থলীতে মৃত্যু ঘটে।

এই ভয়াৱহ দুৰ্ঘটনাটো সংঘটিত হোৱাৰ লগে লগে স্থানীয় ৰাইজে আৰক্ষীক অৱগত কৰে আৰু গৌৰীসাগৰ আৰক্ষী ঘটনাস্থলীত উপস্থিত হৈ দুৰ্ঘটনাগ্ৰস্ত গাড়ীখন জে চি বিৰে ওপৰৰ  অংশ ভাঙি দিয়াৰ পিছতহে চালক তথা গৰাকী নয়ণমণিৰ মৃতদেহ  উদ্ধাৰ কৰি শিৱসাগৰ অসামৰিক চিকিৎসালয়লৈ মৰণোত্তৰ পৰীক্ষাৰ বাবে প্ৰেৰণ কৰে।

নিহত নয়নমণি দেৰগাঁও আৰক্ষী প্ৰশিক্ষণ কেন্দ্ৰৰ ১১ নং বেটিলিয়নৰ হাবিলডাৰ হিচাবে কৰ্মৰত আছিল। ১৯৯১ চনত অসম আৰক্ষীত যোগদান কৰা গোলাঘাট জিলাৰ দেৰগাঁও দুই নং ৱাৰ্ডৰ নিবাসী প্ৰয়াত তিষেশ্বৰ কোঁচৰ পুত্ৰ নয়নমণি  প্ৰায় দুটা মাহৰ পূৰ্বে হাবিলডাৰলৈ পদোন্নতি লাভ কৰিছিল বুলি জানিব পৰা গৈছে।

উল্লেখ্য যে  যুৱ আৰক্ষী বিষয়াজনৰ পিতৃও এনেদৰেই পথ দুৰ্ঘটনাত শোকাৱহভাৱে  মৃত্যুক সাৱটি ল’বলগা হৈছিল।