চলন্ত ৰে’লত সংঘটিত হত্যাকাণ্ডৰ লগত জড়িত আনজন হত্যাকাৰী পাণ্ডেক গ্ৰেপ্তাৰ
চলন্ত ৰে’লত সংঘটিত চাঞ্চল্যকৰ হত্যাকাণ্ডৰ লগত জড়িত আনজন অভিযুক্তক গ্ৰেপ্তাৰ কৰা হৈছে। কালি নিশা ডিব্ৰুগড় আৰক্ষীয়ে বাণীপুৰ ৰে’ল ষ্টেশ্যনৰ সমীপৰ পৰা বিপিন কুমাৰ পাণ্ডে নামৰ লোকজনক গ্ৰেপ্তাৰ কৰে।
বৰ্তমান বিপিন কুমাৰ পাণ্ডেক ডিব্ৰুগড় সদৰ থানাত ৰখা হৈছে। বৃহস্পতিবাৰে তিনিচুকীয়া ৰে’ল আৰক্ষীয়ে হত্যাকাণ্ডটোৰ সৈতে জড়িত আনগৰাকী মূল অভিযুক্ত বিকাশ দাস ওৰফে বুবুক গ্ৰেপ্তাৰ কৰি শিৱসাগৰ আৰক্ষীক গতাই দিয়ে।
আনহাতে, শিমলুগুৰি আৰক্ষী চকীৰ ভাৰপ্ৰাপ্ত বিষয়া উজ্জ্বল গোস্বামীক নিলম্বন কৰা হৈছে। ৰাধা কুমাৰীৰ হত্যাকাৰীক গ্ৰেপ্তাৰৰ পিছতে বিষয়াগৰাকীক নিলম্বনৰ নিৰ্দেশ দিয়া হৈছে। কৰ্তব্যত গাফিলতিৰ বাবে বিষয়াগৰাকীক নিলম্বিত কৰা বুলি জানিব পৰা গৈছে।
যোৱা ১০ জুলাইত ডিব্ৰুগড়-ৰঙিয়া এক্সপ্ৰে’ছত শিৱসাগৰ ষ্টেশ্যন আৰু শিমলুগুৰি ষ্টেশ্যনৰ মাজত সংঘটিত চাঞ্চল্যকৰ হত্যাকাণ্ডৰ হত্যাকাৰী দুজনক আৰক্ষী গ্ৰেপ্তাৰ কৰিবলৈ সক্ষম হৈছে। পূৰ্বে এই ঘটনাত জড়িত বুলি কনক গগৈ নামৰ এজন মানসিকভাৱে অসুস্থ লোকক আৰক্ষীয়ে আটক কৰিছিল।
বিকাশ দাস ওৰফে বুবু নামৰ অপৰাধীজনক তিনিচুকীয়াত ৰে’ল আৰক্ষীৰ হেড কনিষ্টবল মধুৰাম ডেকাই আটক কৰা বুলি আৰক্ষীৰ সূত্ৰই জনাইছে। সূত্ৰটোৱে জনোৱা মতে, এই হত্যাকাৰীজন এজন ছিৰিয়েল কিলাৰ। শিৱসাগৰ-শিমলুগুৰি ষ্টেইশ্যনৰ মাজত হোৱা হত্যাকাণ্ডটোৰ ২৪ ঘণ্টাৰ পিছতে মৰিয়নিত যিটো একে ধৰণৰ হত্যাকাণ্ড হৈছিল, সেইটোও এই বিকাশ দাসেই সংঘটিত কৰিছিল।