চহৰ এলেকাৰ নিম্ন আয়ৰ লোকৰ বাবে ৮৩ হাজাৰটা ঘৰ নিৰ্মাণ কৰিব ৰাজ্য চৰকাৰে

‘ৰাজ্যখনৰ আৰ্থিকভাৱে দুৰ্বল লোকসকলৰ প্ৰয়োজনীয়তাৰ প্ৰতি লক্ষ্য ৰাখি ৰাজ্য চৰকাৰে অতি শীঘ্ৰে বহনক্ষম গৃহ নীতি গ্ৰহণ কৰিব আৰু ইয়াৰ বাবে বৰ্তমানে থকা আইনৰ সংশোধন ঘটাব। আনহাতে ৰাজ্য চৰকাৰে চহৰ এলেকাত থকা নিম্ন আয়ৰ অৰ্থনৈতিকভাৱে পিছপৰা লোকসকলৰ বাবে ৮৩ হাজাৰটা গৃহ নিৰ্মাণ কৰিব।’ আজি মুখ্য মন্ত্ৰীৰ সভা কক্ষত অসম ৰাজ্যিক গৃহ পৰিষদৰ দ্বাৰা প্ৰস্তাৱিত প্ৰকল্প সম্পৰ্কত আলোচনা কৰাৰ উদ্দেশ্যেৰে অনুষ্ঠিত এক বৈঠকত এই সিদ্ধান্ত গ্ৰহণ কৰা হয়।

বৈঠকত অংশ গ্ৰহণ কৰি মুখ্য মন্ত্ৰী সৰ্বানন্দ সোণোৱালে ‘অৰ্থনৈতিকভাৱে দুৰ্বল লোকসকলৰ বাবে বহনক্ষম গৃহ নীতি প্ৰস্তুত কৰিবলৈ নগৰ উন্নয়ন বিভাগক নিৰ্দেশ দিয়ে। মুখ্য মন্ত্ৰীয়ে অতি শীঘ্ৰে এই নীতি চূড়ান্ত কৰিবলৈও বিভাগটোক নিৰ্দেশ দিয়ে।’

মুখ্য মন্ত্ৰী জন সম্পৰ্কৰক্ষী কোষে এন ই নাওলৈ প্ৰেৰণ কৰা বিবৃতি অনুসৰি আজিৰ বৈঠকত অসম ৰাজ্যিক গৃহ পৰিষদৰ অধ্যক্ষ যাদৱ ডেকাই পৰিষদৰ বৰ্তমানৰ কাৰ্যলয় চৌহদত নিৰ্মাণ কৰিব লগা প্ৰস্তাৱিত কাৰ্যালয় আৰু বাণিজ্যিক চৌহদৰ বিষয়টোৰ বিৱৰণ দাঙি ধৰে।

প্ৰস্তাৱিত প্ৰকল্পটোৰ নক্সা প্ৰস্তুত কৰিছে ভাৰত চৰকাৰৰ প্ৰতিষ্ঠান মেকন লিমিটেডে।

আজিৰ বৈঠকত কৃষি আৰু উন্নয়ন মন্ত্ৰী অতুল বৰা, মুখ্য মন্ত্ৰীৰ প্ৰেছ উপদেষ্টা হৃষীকেশ গোস্বামী, বিধায়ক ৰিতুপৰ্ন বৰুৱা, অসম ৰাজ্যিক গৃহ পৰিষদৰ উপাধ্যক্ষ সুভাষ দত্তৰ উপৰি বহু কেইজন বিষয়াও উপস্থিত আছিল।