চামগুৰিত মুল্যবান কাঠসহ দুখন ট্ৰাক জব্দ কৰাক কেন্দ্ৰ কৰি উত্তপ্ত পৰিস্থিতি

নগাঁও জিলাৰ চামগুৰি বাঘবৰালিৰ ৰকলেণ্ডত বুধবাৰে নিশা  স্থানীয় লোকে অভিযান চলাই মুল্যবান কাঠৰ কুণ্ডাসহ দুখন ট্ৰাক জব্দ কৰাক কেন্দ্ৰ কৰি একাংশ স্থানীয় লোকে উত্তপ্ত পৰিস্থিতিৰ সৃষ্টি কৰে।

জানিব পৰা মতে নগাঁও বন সংমণ্ডলৰ অধীনৰ শালনা আঞ্চলিক বন কাৰ্যালয়ৰ অন্তৰ্গত চামগুৰি বাঘবৰালিত বুধবাৰে নিশা একাংশ লোকে কঁঠালগুৰি অঞ্চলৰ পৰা নগাঁও চহৰৰ দিশে আহি থকা এ এছ২৫-৯৬৮৫ আৰু এ এছ ০৯ এ চি-২২৮৬  নম্বৰৰ মুল্যবান মাকৈ কাঠৰ কুণ্ডা ভৰ্তি ট্ৰাক দুখন  ৰাখি টিপি আৰু চালান বিচৰাত গাড়ী দুখনৰ চালকে দিব নোৱাৰাত বন বিভাগক খবৰ দিয়ে।

চোৰাংভাৱে এনেদৰে বন বিভাগৰ একাংশ দুৰ্নীতিপৰায়ণ  বিষয়াক একাংশ সুবিধাভোগী কাঠ সৰবৰাহকাৰীয়ে মেনেজ কৰি চলাই থকা বুলি সন্দেহ ওপজাত  ক্ষুব্ধ একাংশ ৰাইজে গাড়ী দুখন লণ্ডভণ্ড কৰি  উত্তপ্ত পৰিস্থিতিৰ সৃষ্টি কৰে।

আনহাতে বন বিভাগক খবৰ দিয়াৰ পিছতো কোনো লোক উপস্থিত নোহোৱাত ঘটনাস্থলীত চামগুৰি আৰক্ষী  উপস্থিত হৈ গাড়ী দুখন জব্দ কৰি তদন্ত অব্যাহত ৰাখে যদিও কাঠৰ গৰাকীয়ে বন বিভাগৰ  অনুজ্ঞা পত্ৰ আজি  আৰক্ষীক দেখুৱায়।

ইপিনে গাড়ী দুখনৰ মালিকে চামগুৰি আৰক্ষী থানাত গাড়ীদুখন ক্ষতি কৰাৰ বাবে একাংশ লোকৰ ওপৰত এজাহাৰ দাখিল কৰিছে বুলি জানিব পৰা গৈছে। পৰবৰ্তী সময়ত আৰক্ষীয়ে  কি ব্যৱস্থা গ্ৰহণ কৰে সেয়া লক্ষণীয় হ’ব।