চাহ জনগোষ্ঠীৰ সমস্যাক আওকান কৰাৰ বাবে আজি বাগিচাই বাগিচাই জ্বলিব পল্লৱৰ প্ৰতিমূৰ্ত্তি

শক্তি মন্ত্ৰী পল্লৱলোচন দাস এগৰাকী ব্যৰ্থ মন্ত্ৰী। তেওঁ মন্ত্ৰীত্ব পোৱাৰ পিছতো একো উন্নয়ন সাধন হোৱা নাই। এই সমূহৰ বাবে আজি অসমৰ বাগিচাই বাগিচাই শক্তিমন্ত্ৰী পল্লৱলোচন দাসৰ প্ৰতিমূৰ্ত্তি দাহ কৰি তেওঁৰ বিৰুদ্ধে প্ৰতিবাদ সাব্যস্ত কৰিব।

চাহ জনগোষ্ঠীক প্ৰতিনিধিত্ব কৰা পল্লৱলোচন দাসে ৰাজ্যখনৰ এটা প্ৰধান বিভাগৰ দায়িত্ব তথা চৰকাৰখনৰ এজন প্ৰভাৱশালী মন্ত্ৰী হিচাপে স্বীকৃতি লাভ কৰাৰ পিছতো  নিজ জনগোষ্ঠীৰ খাতি খোৱা দৰিদ্ৰ শ্ৰমিকৰ সমস্যাক আওকাণ কৰি অহাত আজি ক্ষোভিত চাহ শ্ৰমিকসকলে মন্ত্ৰীজনৰ প্ৰতিমূৰ্তী দাহ কৰাৰ সিদ্ধান্ত গ্ৰহণ কৰে।

বিগত বিধানসভা নিৰ্বাচনত চাহ শ্ৰমিকক বিভিন্ন প্ৰতিশ্ৰুতিৰে  ভোট আদায় কৰি মন্ত্ৰী হোৱা পল্লবে এতিয়া ঘূৰিকে নাচায় নিজ জনগোষ্ঠীৰ লোকক। এই অভিযোগ জনগোষ্ঠীটোৰ একাংশ ছাত্ৰনেতাৰ।

উল্লেখ্য যে অসমত বহু দিনৰে পৰা চাহ জনগোষ্ঠীটো শোষিত হৈ অহা তথা নিজৰ অধিকাৰৰ পৰা বঞ্চিত হোৱাৰ লগতে অধিকাৰ খৰ্ব হৈ অহাৰ অভিযোগ উত্থাপন হৈ আহিছে।

তেওঁলোকৰ কিছু লোকে অভিযোগ উত্থাপন কৰে যে দৰিদ্ৰ, খাটিখোৱা শ্ৰমিকসকলক প্ৰতিখন চৰকাৰে বঞ্চিত কৰি আহিছে৷ লাঞ্চিত চাহ শ্ৰমিক তথা একাংশ লোকে আজিও কামৰ বিনিময়ত মৰ্যদা নাপায়। পুঁজিপতিৰ হাতোৰাত বন্দী চাহ শ্ৰমিকৰ স্বাধীনতা বুলি ক’লেও ভুল কৈ কোৱা নহ’ব৷

ইয়াৰ উপৰি দীৰ্ঘদিনীয়া মজুৰি বৃদ্ধিৰ দাবী উত্থাপন কৰি অহা চাহ শ্ৰমিকৰ নেতাসকলে কয় যে ৩৫০ টকা দৈনিক মজুৰি দিয়াৰ দাবীত আমি আন্দোলন শক্তিশালী কৰি তুলিম। তাৰোপৰি আজি  বাগিচাই বাগিচাই শ্ৰম মন্ত্ৰী পল্লৱ লোচন দাসৰ প্ৰতিমূৰ্তি দাহ আৰু অহা ২৮ ফেব্ৰুৱাৰীত ৰাষ্ট্ৰীয় ঘাই পথ অৱৰোধ কাৰ্যসূচী সফল কৰি তুলিবলৈ সকলোকে আহ্বান জনায়।