চীনৰ অবৈধ কাৰ্যকলাপ সন্দৰ্ভত হস্তক্ষেপ দাবী টি এম পি কেৰ
সদৌ অসম মিছিং ছাত্ৰ সন্থা টাকাম মিছিং পৰিণ কেবাঙ (টি এম পি কে) ই কেন্দ্ৰীয় চৰকাৰ তথা আন্ত:ৰাষ্ট্ৰীয় সম্প্ৰদায়ক চীনে তিব্বতত চলাই অহা অবৈধ কাৰ্যকলাপত হস্তক্ষেপ কৰাৰ দাবী জনাইছে।
সংগঠনটোৱে জনায় যে তিব্বতত চীনে ছাংপো নদীক প্ৰদূষিত কৰাৰ ফলত সেই নদীটোৱে অৰুণাচলত চিয়াঙ আৰু অসমত ব্ৰহ্মপুত্ৰ হিচাপে পৰিচিত নদী দুখনকো প্ৰদূষিত কৰিছে আৰু ই এক অতি ভয়ংকৰ অন্যায়।
ছাত্ৰ সংগঠনটোৱে লগতে দাবী কৰে যে চীনৰ চৰকাৰে শীঘ্ৰেই ওয়ৰলাঙ ছাংপো নদীৰ অবৈধ গতি সলনি কৰা তথা ইয়াক প্ৰদূষিত কৰা কাৰ্য বন্ধ কৰিব লাগে।
টি এম পি কেই মিছিং একচন কমিটি আৰু সদৌ মিছিং মহিলা মৰ্চাৰ সহযোগত ১১ ডিচেম্বৰত গোটেই অসমজুৰি আৰু পাছিঘাটৰ ৰঙাঘাটত নদীখনৰ জৈৱ বৈচিত্ৰ ধ্বংস কৰাৰ চীনৰ ষড়যন্ত্ৰৰ বিৰুদ্ধে এক প্ৰতিবাদী কাৰ্যসূচী গঢ়ি তুলিব।
সংগঠনটোৱে চীনৰ এনে ভয়ংকৰ ষড়যন্ত্ৰৰ বিৰুদ্ধে সকলো জনসাধাৰণকে একত্ৰিত হৈ প্ৰতিবাদ কৰাৰ বাবে আহ্বান জনাইছে।
ইপিনে ব্ৰহ্মপুত্ৰৰে বৈ অহা ঘোলা পানীক লৈ ইতিমধ্যে সৰ্বত্ৰ প্ৰতিক্ৰিয়াৰ সৃষ্টি হৈছে। চৰকাৰে নদীখনৰ প্ৰদূষিত পানী পৰীক্ষাৰ ব্যৱস্থা গ্ৰহণ কৰিছে আৰু প্ৰাথমিক পৰীক্ষাত এই পানী অত্যন্ত ক্ষতিকাৰক হিচাপে বিবেচিত হৈছে।
ইতিমধ্যে ব্ৰহ্মপুত্ৰৰ প্ৰদূষিত পানীৰ দ্বাৰা আক্ৰান্ত ৰাজ্যখনত হৈ জীৱ-জন্তুৰ মৃত্যু হোৱাৰ বাতৰিও পোৱা গৈছে।