চৰকাৰ গঠনৰ দুবছৰৰ পিছত সম্প্ৰসাৰণ হ’ল মন্ত্ৰীসভা; শপত ল’লে সাতগৰাকী নতুন মন্ত্ৰীয়ে
বহু জল্পনা-কল্পনাৰ অৱসান ঘটাই অৱশেষত চৰকাৰ গঠনৰ দুবছৰৰ পিছত সম্প্ৰসাৰণ হ’ল অসম মন্ত্ৰীসভা। আজি গুৱাহাটীস্থিত ৰাজভৱনত অনুষ্ঠিত শপত গ্ৰহণ অনুষ্ঠানত শপত গ্ৰহণ কৰিলে সাতগৰাকী নতুন মন্ত্ৰীয়ে ।
অসমৰ মুখ্য মন্ত্ৰী সৰ্বানন্দ সোণোৱালৰ উপস্থিতিত ৰাজ্যপাল জগদীশ মুখীয়ে আজি ৰাজভৱনত নতুন মন্ত্ৰীকেইজনক দায়িত্ব আৰু গোপনীয়তাৰ শপত বাক্য পাঠ কৰায়।
বিজেপি নেতৃত্বাধীন সোণোৱাল মন্ত্ৰীসভাৰ সম্প্ৰসাৰণত ৫ গৰাকী বিজেপি বিধায়ক আৰু ইয়াৰ সহযোগী অগপ তথা বিপিএফৰ পৰা এগৰাকীকৈ বিধায়কে মন্ত্ৰিত্বৰ শপত লয়।
আজি নতুন মন্ত্ৰী হিচাপে শপত গ্ৰহণ কৰা বিজেপি বিধায়ক কেইজন হৈছে প্ৰাক্তন সভাপতি তথা পূব গুৱাহাটী সমষ্টিৰ বিধায়ক সিদ্ধাৰ্থ ভট্টাচাৰ্য, জাগীৰোডৰ বিধায়ক পীযুষ হাজৰিকা, সদৌ অসম ছাত্ৰ সন্থাৰ প্ৰাক্তন সাধাৰণ সম্পাদক তথা সোণাৰীৰ বিধায়ক তপন গগৈ, ৰঙিয়াৰ বিধায়ক ভৱেশ কলিতা আৰু প্ৰাক্তন কংগ্ৰেছী তথা ডিফুৰ বিধায়ক ছুম ৰংহাং।
আনহাতে বঙাইগাওঁ বিধানসভা সমষ্টিৰ পৰা একেৰাহে ছয়বাৰকৈ বিধায়ক হিচাপে নিৰ্বাচিত, অগপৰ আমোলৰ প্ৰাক্তন মন্ত্ৰী তথা দলৰ কাৰ্যকৰী সভাপতি ফনীভুষণ চৌধুৰী আৰু কংগ্ৰেছ চৰকাৰৰ প্ৰাক্তন পৰিবহণ মন্ত্ৰী তথা বি পি এফক প্ৰতিনিধিত্ব কৰা ছিডলী সমষ্টিৰ বিধায়ক চন্দন ব্ৰহ্ম।
উল্লেখ্য যে চৌধুৰী, ভট্টাচাৰ্য, ৰংহাং আৰু ব্ৰহ্মই কেবিনেট মন্ত্ৰী হিচাপে আৰু হাজৰিকা, কলিতা আৰু গগৈয়ে স্বতন্ত্ৰ ৰাজ্যিক মন্ত্ৰী হিচাপে শপত গ্ৰহণ কৰে।
ইফালে শপত লোৱাৰ পাছতে বিজেপিৰ জ্যেষ্ঠ বিধায়ক সিদ্ধাৰ্থ ভট্টাচাৰ্যই সম্প্ৰসাৰিত মন্ত্ৰীসভাত স্থান লাভ কৰা বাবে মুখ্য মন্ত্ৰী সৰ্বানন্দ সোণোৱাল, প্ৰধান মন্ত্ৰী নৰেন্দ্ৰ মোদী আৰু ৰাষ্ট্ৰীয় অধ্যক্ষ অমিত শ্বাহক টুইটাৰ যোগে অশেষ ধন্যবাদ জনায়।
আনহাতে মন্ত্ৰীসভা সম্প্ৰসাৰণক লৈ বিজেপিৰ ভিতৰচ’ৰাত দেখা দিছে অন্তৰ্কন্দল। ডিব্ৰুগড় সমষ্টিৰ বিধায়ক তথা জ্যেষ্ঠ নেতা প্ৰশান্ত ফুকনে মন্ত্ৰীসভাত স্থান নাপাই বহুতো সমিতি তথা দলীয় বিষয়ববীয়াৰ পদৰ পৰা পদত্যাগ কৰা বুলি জানিব পৰা গৈছে।
জ্যেষ্ঠ বিধায়কগৰাকীৰ এনে সিদ্ধান্তক বিজেপি নেতৃত্বই কেনেদৰে গ্ৰহণ কৰে সেয়া সময়ত লক্ষ্যণীয় হ’ব।