ছত্তিশগড়ৰ ৰাইপুৰত উত্তৰ-পূৰ্বাঞ্চলৰ ছগৰাকী যুৱতীক গ্ৰেপ্তাৰ : দেহ ব্যৱসায়ত জড়িতৰ অভিযোগ

উত্তৰ-পূবৰ যুৱতীক নাৰী সৰবৰাহকাৰীসকলে ভাল চাকৰি দিয়াৰ প্ৰলোভনেৰে দেশৰ বিভিন্ন প্ৰান্তলৈ লৈ গৈ অবৈধ কামত লিপ্ত কৰোৱাৰ এক ঘটনা পোহৰলৈ আহিছে। ছত্তীশগড়ৰ ৰাইপুৰত এনে এক ষড়যন্ত্ৰৰ বলি হৈ গ্ৰেপ্তাৰ হ’ব লগীয়া হৈছে উত্তৰ-পূৰ্বাঞ্চলৰ ছগৰাকী যুৱতী।

অৰুণাচল প্ৰদেশ, মিজোৰাম, নাগালেণ্ড আৰু মণিপুৰৰ এই যুৱতী কেইগৰাকীক দেওবাৰে সন্ধিয়া ৰাইপুৰত অনৈতিক কাৰ্যত লিপ্ত থকাৰ অভিযোগত ৰাজেন্দ্ৰ নগৰ আৰক্ষী থানাৰ অন্তৰ্গত এটি অঞ্চলৰ পৰা গ্ৰেপ্তাৰ কৰা হৈছে।

এই কথা নিশ্চিত কৰি দিল্লী আৰক্ষীৰ মহাপৰিদৰ্শক ৰবীন হিবুৱে তেওঁৰ ফেচবুকত দেওবাৰে প’ষ্ট কৰিছে : “ ছত্তিশগড়ৰ ৰাইপুৰত অনৈতিক কাৰ্যত লিপ্ত থকাৰ অভিযোগত ৰাজেন্দ্ৰ নগৰ আৰক্ষী থানাই উত্তৰ-পূৰ্বাঞ্চলৰ ছগৰাকী যুৱতীক (নাগালেণ্ড, মণিপুৰ, অৰুণাচল প্ৰদেশ, মিজোৰামৰ) গ্ৰেপ্তাৰ কৰিছে।”

গ্ৰেপ্তাৰ হোৱা যুৱতী কেইগৰাকীক সোমবাৰে আদালতত হাজিৰ কৰোৱা হ’ব বুলি উল্লেখ কৰি আৰক্ষী বিষয়াগৰাকীয়ে লিখিছে, “আজি সন্ধিয়া উত্তৰ-পূৰ্বাঞ্চলৰ ছগৰাকী যুৱতীক গ্ৰেপ্তাৰ কৰা হৈছে আৰু কাইলৈ তেওঁলোকক আদালতত হাজিৰ কৰোৱা হ’ব।”

দিল্লী আৰক্ষীৰ মহাপৰিদৰ্শক  হিবুৱে প্ৰকাশ কৰিছে যে ৰাইপুৰৰ এছ এছ পি অমৰেশ কুমাৰে তালাচীৰ সময়ত উক্ত যুৱতী কেইগৰাকীক হাতে-লোটে ধৰা ঘটনাটো নিশ্চিত কৰিছে।

উত্তৰ-পূৰ্বাঞ্চলৰ পৰা ভাল চাকৰি দিয়াৰ লোভ দেখুৱাই নাৰী সৰবৰাহকাৰী চক্ৰই যুৱতীসকলক দেহ ব্যৱসায়ত জড়িত কৰাৰ সম্ভাৱনা ব্যক্ত কৰি মহাপৰিদৰ্শক হিবুৱে কয় যে তেওঁ  ৰাইপুৰৰ এছ এছ পি গৰাকীক যুৱতীকেইগৰাকীক এই ব্যৱসায়ত নিয়োগ কৰাৰ আঁৰত জড়িত থকা লোকসকলৰ বিৰুদ্ধে ব্যৱস্থা গ্ৰহণ কৰিব লাগে।

“মই এছ এছ পি গৰাকীক উত্তৰ-পূৰ্বাঞ্চলৰ পৰা নিয়োগকাৰীসকলৰ বিৰুদ্ধে ব্যৱস্থা গ্ৰহণ কৰিবলৈ কৈছো, যিসকলে ভাল চাকৰিৰ প্ৰলোভন দি তেওঁলোকক দেহ ব্যৱসায়ত লিপ্ত কৰোৱাইছিল,”-হিবুৱে কয়।

অৱশ্যে, তেওঁ লগতে জনাইছে যে স্থানীয় হেল্পিং হেণ্ডছ নামৰ বেচৰকাৰী সংস্থাৰ সহযোগত তেওঁলোকৰ জামিনৰ বাবে এগৰাকী অধিবক্তা বিচাৰি পোৱা গৈছে।