জাপানৰ প্ৰতিনিধি দলৰ জৰিয়তে মণিপুৰত বিনিয়োগ কৰিবলৈ আহ্বান নাজমা হেপতুল্লাৰ
মণিপুৰৰ ৰাজ্যপাল নাজমা হেপতুল্লাৰ লগত জাপানৰ পৰা অহা ভিকছু জ্ঞমিঅ’ নাকামুৰাৰ নেতৃত্বত ১১ জনীয়া প্ৰতিনিধি দল এটাই ৰাজ ভৱনত এক বৈঠকত মিলিত হয়। দ্বিতীয় বিশ্ব যুদ্ধৰ সময়ত মণিপুৰত প্ৰাণ আহুতি দিয়া জাপানৰ সৈনিক, ভাৰতীয় সৈনিক আৰু অসামৰিক সেৱাৰ বিষয়া সকলক শ্ৰদ্ধাঞ্জলী জ্ঞাপন কৰাৰ উদ্দেশ্যে জাপানৰ প্ৰতিনিধি দলটো ইম্ফলত আহি উপস্থিত হৈছে। দ্বিতীয় বিশ্ব যুদ্ধৰ যুদ্ধস্থলী মণিপুৰত জাপানৰ বহু সৈনিক নিহত হৈছিল। এই প্ৰতিনিধি দলটোৱে ইম্ফল, ছাংছুক, লকটক আদি বিভিন্ন ঠাইত দ্বিতীয় বিশ্ব যুদ্ধত প্ৰাণ আহুতি দিয়া সকলৰ সমাধি ক্ষেত্ৰ সমূহ পৰিদৰ্শন কৰিব।
ইয়াৰ উপৰি উত্তৰ-পূবৰ লগত সৌহাৰ্দপূৰ্ণ সম্পৰ্কৰ বাবেও জাপান আগ্ৰহী বুলি প্ৰতিনিধি দলটোৰ নাকামুৰাই জানিবলৈ দিয়ে। লগতে লকটক হ্ৰদৰ চাফ চিকুন তথা মণিপুৰৰ ৰাস্তা-পথৰ উন্নয়নৰ বাবেও জাপানে বিনিয়োগ কৰিব বুলি আলোচনাৰ শেষত জানিবলৈ দিয়ে।
আনহাতে জাপানে বিনিয়োগ কৰাৰ সিদ্ধান্তক মণিপুৰৰ ৰাজ্যপাল হেপতুল্লাই আদৰণি জনাইছে। মণিপুৰৰ ৰাস্তা-ঘাটৰ উন্নয়ন হ’লে দক্ষিণ-পূব এছিয়াৰ ৰাষ্ট্ৰ সমূহৰ লগত যোগাযোগৰ সু-সম্পৰ্ক গঢ় লৈ উঠিব বুলি ৰাজ্যপাল গৰাকীয়ে ব্যক্ত কৰে। লগতে কয় যে যদিহে মণিপুৰ চৰকাৰে জাপানৰ পৰ্যটক সকলক পৰ্যাপ্ত পৰিমাণৰ সুবিধা প্ৰদান কৰে তেন্তে মণিপুৰৰ পৰ্যটনস্থলী উন্নতমানৰ কৰাত তেওঁ অধিক গুৰুত্বপূৰ্ণ ভূমিকা প্ৰদান কৰিব।