ডিব্ৰুগড়ৰ জকাইত ‘জকাই পৰ্যটন মহোৎসৱ’ৰ আয়োজন

গ্ৰাম্য পৰ্যটনৰ প্ৰসাৰৰ উদ্দেশ্যে ডিব্ৰুগড়ৰ জকাইত আজি জিলা প্ৰশাসনে সোণালী প্ৰভাত নামৰ স্বেচ্ছাসেৱী সংগঠনৰ সহযোগত জকাই পৰ্যটন মহোৎসৱৰ আয়োজন কৰে। এই দিনযোৰা অনুষ্ঠানটোত আহোম, সোণোৱাল কছাৰী, কুমাৰ, চাহ জনজাতি আৰু নেপালীকে ধৰি ৬ সম্প্ৰদায়ৰ বৰ্ণিল সংস্কৃতি আৰু পৰম্পৰা প্ৰদৰ্শন কৰা হয়।

সোণালী প্ৰভাতৰ সম্পাদক হিৰনমনি বৰগোহাঁয়ে জনোৱা মতে  ডিব্ৰুগড়ৰ পৰ্যটন খণ্ডৰ বিকাশৰ লক্ষৰে প্ৰথমবাৰৰ বাবে এই মহোৎসৱটো আয়োজন কৰা হৈছে।

বিভিন্ন পৰম্পৰাগত খাদ্য সম্ভাৰ তথা পৰম্পৰাগত পানীয়ৰে ভৰপুৰ মহোৎসৱটোত খাদ্যৰ জুতি ল’বলৈ অহা মানুহেৰে ভৰি পৰা দেখা যায়।

বৰগোহাঁয়ে জনোৱা মতে মহোৎসৱটোৰ সৈতে সংগতি ৰাখি ৬ টাকৈ স্থানীয় সম্প্ৰদায়ে প্ৰদৰ্শন কৰা সাংস্কৃতিক অনুষ্ঠানেও দৰ্শকৰ বিপুল সঁহাৰি লাভ কৰে।

উল্লেখযোগ্য যে জোকাই সংৰক্ষিত বনাঞ্চল ডিব্ৰুগড় জিলা অন্যতম চহকী  জৈৱ-বৈচিত্ৰ্যৰ ঘাটি। উক্ত সংস্থাটোৱে ইয়াৰ সংৰক্ষণৰ বাবে কাম কৰি আহিছে।

যোৱা ৪ মাহে তেওঁলোকে অঞ্চলটোৰ উন্নয়নৰ বাবে কাম কৰি আহিছে বুলি উল্লেখ কৰি সংস্থাটোৰ আন এগৰাকী সদস্য নাৰায়ণ দাসে কয় যে এই মহোৎসৱটোৰ আয়োজনৰ জৰিয়তে স্থানীয় লোকসকলক জড়িত কৰাই তেওঁলোকে জিলাখনত বহনক্ষম পৰ্যটনৰ সম্প্ৰসাৰণ কৰিব খোজে।

তেওঁ লগতে কয় যে নিয়োগ সৃষ্টিৰ ক্ষেত্ৰত, বিশেষকৈ গাঁৱৰ যুৱচামৰ বাবে গ্ৰাম্য পৰ্যটন বহুত সম্ভাৱনা কঢ়িয়াই আনিছে। এই সুজুগসমূহৰ বাবে যুৱক-যুৱতীসকলে যাতে নিজকে সাজু কৰি ৰাখিব পাৰে তাৰ বাবে তেওঁলোকক আমাৰ ফালৰ পৰা প্ৰশিক্ষণ দিয়া হয়।