ডিমা হাচাওত পথ দুৰ্ঘটনা : ঘটনাস্থলীতে নিহত এজন বাইক আৰোহী

ডিমা হাচাও জিলাৰ মাইবাঙ আৰক্ষী থানাৰ অন্তৰ্গত কালাচান্দ বাশাবাৰিত মঙলবাৰে সন্ধিয়া প্ৰায় ৭ মান বজাত ৰাষ্ট্ৰীয় ঘাইপথৰ সমীপত এক ভয়ংকৰ দুৰ্ঘটনা সংঘটিত হয়। দুৰ্ঘটনাটোত থিতাতে নিহত হয় এজন যুৱক।

জানিবপৰা মতে মটৰচাইকেলেৰে তীব্ৰ বেগত আহি থকা যুৱকজন হঠাৎ ৰাষ্ট্ৰীয় ঘাইপথৰ দাঁতিত নিয়ন্ত্ৰণ হেৰুৱাই তলত বাগৰি পৰে। আৰু বাইক আৰোহী যুৱকজন থিতাতে নিহত হয়।

দুৰ্ঘটনাস্থলীৰ ওচৰতে থকা কিছু লোকে আৰক্ষীক খবৰ দিয়াত কিছু সময় পাছতে কালাচান্দ আৰক্ষী উপস্থিত হৈ যুবকজনক উদ্ধাৰ কৰে। আৰু মৰণোত্তৰ পৰীক্ষাৰ বাবে মাইবাঙ গ্ৰামীণ চিকিত্সালয়ত লৈ যায়। ইতিমধ্যে যুৱকজন ওৱাজ’ গাঁৱৰ ল’ৱাই হাফলংবাৰ বুলি চিনাক্ত কৰা হৈছে।

উল্লেখনীয় যে পাৰ্বত্য ডিমা হাচাও জিলাৰ ৰাষ্ট্ৰীয় ঘাইপথত পথ দুৰ্ঘটনাৰ সংখ্যা দ্ৰুতগতিত বৃদ্ধি পাব ধৰিছে। প্ৰায়েই দুৰ্ঘটনা সংঘটিত হৈ আছে। আজি লাঙটিঙ আৰু মুপা অঞ্চলৰ মাজত অনুৰূপ ভাৱে এখন বলেৰ’ পিক আপ দুৰ্ঘটনাগ্ৰস্থ হয়। য’ত চালক গুৰুতৰ ভাবে আহত হয়।