ডিমা হাচাও জিলাত বিদেশী চিনাক্তকৰণৰ নামত সীমান্ত আৰক্ষীৰ দৌৰাত্ম্য

ডিমা হাচাও জিলাত বিদেশী চিনাক্তকৰণৰ নামত আৰক্ষীৰ সীমান্ত শাখাৰ দৌৰাত্ম্যই বিশেষ সম্প্ৰদায়ৰ ৰাইজক হাৰাশাস্তি কৰাৰ অভিযোগ  উত্থাপন কৰিছে একাংশ লোকে।

জিলাখনৰ মান্দাৰদিচা, হাতীখালী, লাংটিং প্ৰমুখ এলেকাত আৰক্ষীৰ এনে অত্যাচাৰৰ বাবে স্থানীয় ৰাইজসকল আতংকিত হৈ পৰিছে।

উল্লেখযোগ্য যে উক্ত এলেকাত নিশা হ’লেই সীমান্ত আৰক্ষীৰ সহকাৰী পৰিদৰ্শক জনৈক বসুমতাৰীৰ নেতৃত্বত চলে বিদেশী চিনাক্তকৰণৰ অভিযান।

জানিব পৰা মতে উক্ত এলেকাৰ কোনো দোকানত বহি আৰক্ষীৰ দলটোৱে স্থানী লোকক মাতি নথি-পত্ৰ দেখুৱালৈ নিৰ্দেশ দিয়ে আৰু নথি-পত্ৰ দেখুৱাব নোৱাৰিলে হাফলঙলৈ মাতি পঠিৱাই। আনকি ভাৰতীয় নাগিৰকৰ বৈধ নথি-পত্ৰ থকাৰ পিছতো নানা ধৰণৰ মানসিক অত্যাচাৰ চলোৱা বুলি স্থানীয় লোকে জানিবলৈ দিয়ে।

মঙলবাৰে নৰ্থ ইষ্ট নাওয়ে পাৰ্বত্য জিলাৰ লাংটিঙৰ পৰা মান্দৰদিচাত উপস্থিত হৈ সীমান্ত আৰক্ষীয়ে চলোৱা বিদেশী চিনাক্তকৰণৰ সম্পৰ্কে স্থানীয় ৰাইজৰ লগত আলোচনা কৰাত সমগ্ৰ ঘটনাটো পোহৰলৈ আহে।

অৱশ্যে একাংশই আৰক্ষীৰ ভয়ত মুখ খোলাৰ পৰা বিৰত থাকে যদিও আৰক্ষীৰ হাৰাশাস্তিৰ সন্মুখীন হোৱা এগৰাকী ভুক্তভোগীয়ে ভাৰতীয় নাগৰিকৰ বৈধ নথি-পত্ৰ থাকৰ পিছতো আৰক্ষীক ধন দিব লগা হৈছে বুলি জানিবলৈ দিয়ে।

একেদৰে মান্দাৰদিচাৰ এক বাঙালী হিন্দু পৰিয়ালেও ১৯৫১ চনৰ চনৰ ৰাষ্ট্ৰীয় নাগৰিকপঞ্জীৰ তথ্য থকাৰ লগতে দেউতাকৰ ৰে’লৱে চাকৰিৰ ১৯৬১ চনৰ নথি দেখুৱাৰ পিছতো আৰক্ষীক ধন দিব লগা হৈছে বুলি অভিযোগ উত্থাপন কৰে।