ডিমৌত বন্যহস্তীৰ আক্ৰমণত কৰুণ মৃত্যু মহিলাৰ

শনিবাৰে নিশা শি‌ৱসাগৰৰ ডিমৌত বন্যহস্তীৰ আক্ৰমণত এগৰাকী মহিলা নিহত হয়। ডিমৌ ৰাজহ চক্ৰৰ অন্তৰ্গত পানীদিহিং মৌজাৰ ব্ৰহ্মপুত্ৰৰ বুকুৰ চিতলীয়া গোৰ্খা চাপৰিত সংঘটিত হৈছে এই কৰুণ ঘটনা।

শনিবাৰে নিশা গাঁৱখনত বন‍্যহস্তীৰ এটা জাকে সন্ত্ৰাসৰ সৃষ্টি কৰে। বন্যহস্তীৰ জাকটোৱে এফালৰপৰা তহিলং কৰি আহে শস্যপথাৰ, ঘৰ-দুৱাৰ ইত্যাদি। হাতীৰ সন্ত্ৰাসত আতংকিত গঞাই নিশাৰ আন্ধাৰত দিশহাৰা হৈ পৰে। ইয়াৰ মাজতে  হাতীৰ অতৰ্কিত আক্ৰমণত ফুলমতি পেগু ওৰফে মনিতা পেগু নামৰ মহিলাগৰাকী নিহত হয়।

বন‍্যহস্তীৰ আক্ৰমণত মহিলাগৰাকীয়ে প্ৰাণ বচাই পলাবলৈ চেষ্টা কৰাৰ সময়তে খেদি খেদি দুটা হাতীয়ে মহিলাগৰাকীৰ ওপৰত আক্ৰমণ চলায়। স্বামী আৰু তিনি সন্তানৰ সন্মুখতে কৰুণ মৃত্যুক সাৱটি লয় মণিতা পেগুৱে। পত্নীক বচাবলৈ আপ্ৰাণ চেষ্টা কৰা দেবেন পেগু হাতীৰ আক্ৰমণত আহত হৈছে।

উল্লেখ্য যে নিচেই পুৱাই বন বিভাগক স্থানীয় লোকে অৱগত কৰাৰ পিচতো ৬ ঘন্টা লৈকে বন বিভাগ অথবা আৰক্ষীৰ লোক ঘটনাস্থলীত উপস্থিত হোৱা নোহোৱাত  ৰাইজৰ মাজত তীব্ৰ ক্ষোভৰ সৃষ্টি হয়।

ক্ষুব্ধ লোকে চৰকাৰ আৰু বন বিভাগৰ বিৰুদ্ধে বিভিন্ন শ্লোগান দি হাতী মৰিলেহে বন বিভাগৰ মানুহ আহে, কিন্তু মানুহ মৰিলে কিয় নাহে বুলিও প্ৰশ্ন উত্থাপন কৰে।

ৰাইজে লগতে নতুন বনমন্ত্ৰী আৰু স্থানীয় বিধায়কক এই বিষয়ত ব্যৱস্থা গ্ৰহণৰ দাবী জনাইছে স্থানীয়।