ড০ টি আও এন ই চি স্বৰ্ণ কাপ ফুটবল প্ৰতিযোগিতাত অংশ গ্ৰহণ মুখ্য মন্ত্ৰী সৰ্বানন্দৰ
‘দেশৰ ক্ৰীড়া ক্ষেত্ৰলৈ সুনাম কঢ়িয়াই আনি আন্তঃৰাষ্ট্ৰীয় মহান খেলুৱৈ ড০ টি আওই যি আদৰ্শ প্ৰতিষ্ঠা কৰি গৈছে, সেই আদৰ্শেৰে উত্তৰ-পূৰ্বাঞ্চলৰ নৱ প্ৰজন্ম আগুৱাই যাব লাগিব। ড০ আওৰ ক্ৰীড়া শৈলীয়ে আমাৰ ফুটবল জগতক গৰিমামণ্ডিত কৰি তুলিছে। এই গৰাকী মহান খেলুৱৈৰ আদৰ্শেৰে নিজৰ দক্ষতা আৰু যোগ্যতা প্ৰকাশ কৰি আমাৰ উত্তৰ-পূৰ্বাঞ্চলৰ নৱ প্ৰজন্মই ৰাষ্ট্ৰীয় তথা আন্তঃৰাষ্ট্ৰীয় পৰ্যায়ত উজলি উঠিব লাগিব।’ আজি পল্টনবজাৰস্থিত ভাৰতীয় ক্ৰীড়া প্ৰাধিকৰণৰ আঞ্চলিক কেন্দ্ৰৰ খেলপথাৰত অনুষ্ঠিত এন ই চি স্বৰ্ণ কাপ ফুটবল প্ৰতিযোগিতাৰ খেল উদ্বোধন কৰি মুখ্য মন্ত্ৰী সৰ্বানন্দ সোণোৱালে ভাষণ প্ৰসংগত এইদৰে কয়।
মুখ্য মন্ত্ৰী গৰাকীয়ে ৰাজ্য চৰকাৰে ক্ৰীড়াৰ উন্নয়নৰ ওপৰত সৰ্বাধিক গুৰুত্ব আৰোপ কৰাৰ কথা উল্লেখ কৰি কয় যে অসমৰ ৩৩ খন জিলাত ক্ৰীড়া আন্তঃগাঁঠনি নিৰ্মাণৰ ওপৰত চৰকাৰে সৰ্বাধিক গুৰুত্ব আৰোপ কৰিছে।
মুখ্য মন্ত্ৰী গৰাকীয়ে ৰাষ্ট্ৰীয় তথা আন্তঃৰাষ্ট্ৰীয় প্ৰতিযোগিতাসমূহত বিশেষ সফলতা কঢ়িয়াই অনা খেলুৱৈ সকলক ৰাজ্য চৰকাৰে আৰ্থিক সাহায্য প্ৰদান কৰাৰ উপৰি স্ংস্থাপনৰ বাবেও সিদ্ধান্ত গ্ৰহণ কৰিছে বুলি উল্লেখ কৰে।
আজিৰ অনুষ্ঠানত ড০ টি আও ২১ বছৰ অনূৰ্ধ্ব এন ই চি স্বৰ্ণ কাপ ফুটবল প্ৰতিযোগিতাৰ আয়োজক সমিতিৰ সভাপতি স্বপ্ননীল বৰুৱা, উপ-সভাপতি সুভাষ বসুমতাৰী প্ৰমুখ্যে বিশিষ্ট খেলুৱৈ সকল উপস্থিত আছিল।