তিনিচুকীয়াত এছবিআইৰ এটিএমত নিগনিয়ে কুটিলে ১২ লক্ষাধিক টকা

উজনি অসমৰ বাণিজ্যিক চহৰ তিনিচুকীয়াৰ এটা এটিএমত নিগনিয়ে প্ৰায় ১২ লক্ষাধিক টকা কুটি নষ্ট কৰা ঘটনা এটিয়ে সমগ্ৰ ৰাজ্যত সৃষ্টি কৰিছে তীব্ৰ প্ৰতিক্ৰিয়াৰ।

ঘটনাৰ বিৱৰণী অনুসৰি তিনিচুকীয়াৰ হিজুগুৰিৰ গাৰ্গ মটৰ্ছৰ সমীপত থকা ষ্টেট বোংক অৱ ইণ্ডিয়াৰ এ টি এম বিগত প্ৰায় ২০ দিন ধৰি যান্ত্ৰিক বিজুতিৰ বাবে অচল হৈ আছিল। মুঠ ২৯ লাখ ৪৮ হাজাৰ টকা থকা এটিএমটো শেহতীয়াভাৱে কলকতাৰ পৰা অহা বিশেষজ্ঞই খোলাৰ পাছতহে এই ভয়ংকৰ কাণ্ড পোহৰলৈ আহে।

সম্প্ৰতি এটিএমটোত থকা প্ৰায় ১২ লাখ ৩৮ হেজাৰ টকা নিগনিয়ে কুটি নষ্ট কৰাৰ তথ্য পোহৰলৈ অহাৰ লগতে টকাখিনিৰ সৈতে মৃত নিগনিটো উদ্ধাৰ কৰা হৈছে বুলি জানিব পৰা হৈছে।

আনহাতে বাকী ১৭ লাখ ১০ হোজাৰ টকা অক্ষত অৱস্থাত উদ্ধাৰ কৰা হৈছে। এই সমগ্ৰ ঘটনা সন্দৰ্ভত ষ্টেট বেংক অৱ ইণ্ডিয়াৰ এটিএম পৰিচালনা কৰা এফ আই এছ পেমেণ্ট ছলিউশ্যন এণ্ড ছাৰ্ভিচেছ (আই) প্ৰাইভেট লিমিটেডৰ জ্যেষ্ঠ কাৰ্যবাহী (এটিএম অপাৰেশ্যন) মিঠুন দুৱৰাই ইতিমধ্যে তিনিচুকীয়াৰ হিজুগুৰি আৰক্ষী চকীত এখন এজাহাৰ দাখিল কৰিছে বুলি জানিব পৰা গৈছে।