তিনিচুকীয়াৰ ডিৰাকত ২০ জন সন্দেহজনক বাংলাদেশী আটক

সমগ্ৰ অসমতে অবৈধ বাংলাদেশী নাগৰিকৰ বিৰুদ্ধে ৰাজ্যখনৰ জাতীয় দল-সংগঠনসমূহে সৰৱ হৈ থকাৰ সময়তে তিনিচুকীয়া জিলাৰ ডিৰাক সীমান্তত স্থানীয় ৰাইজে ২০ জন সন্দেহজনক বাংলাদেশী নাগৰিকক আটক কৰাৰ ঘটনাই প্ৰতিক্ৰিয়াৰ সৃষ্টি কৰিছে।

এন আৰ চিৰ খচৰা প্রকাশৰ বাবে প্ৰস্তুতি চলাই থকাৰ সময়তে দেওবাৰে  তিনিচুকীয়া জিলাৰ ডিৰাক সীমান্তত ৰাইজে ২০জনকৈ সন্দেহজনক বাংলাদেশীক আটক কৰি আৰক্ষীক গতাই দিয়ে।

এই ঘটনাই কৰিমগঞ্জ অঞ্চলৰ এজেণ্টৰ জৰিয়তে অসম-অৰুণাচলৰ বিভিন্ন স্থানলৈ সন্দেহজনক বাংলাদেশী নাগৰিকৰ সোঁত বর্তমানেও অব্যাহত থকাৰ কথাকেই স্পষ্ট কৰে।

অৰুণাচল প্রদেশৰ তেজু জিলাৰ ৱাক্রত মিস্ত্রী ৰূপে কর্মৰত ৰচিদ আহমেদ (৫৫) নাম লোকজনে কমিছনৰ অংকত ১৯জন সন্দেহজনক বাংলাদেশী নাগৰিকক অৰুণাচলত দিন-হাজিৰা কৰিবলৈ আনি অসম-অৰুণাচল সীমান্ত ডিৰাক গে’টত আবদ্ধ হৈ পৰে।

অৰুণাচলৰ প্রৱেশ পথ ডিৰাক গে’টত আৰক্ষীয়ে আন্তঃৰাজ্যিক পাৰপত্র পৰীক্ষা কৰোঁতেই জোলোঙাৰ মেকুৰী ওলাই পৰে। লগত কোনো নথি-পত্র নথকা লোককেইজনক প্রৱেশত বাধা দিয়াৰ পিছত ইফালে-সিফালে ঘূৰি ফুৰোঁতে স্থানীয় ৰাইজৰ সন্দেহ হোৱাত লোককেইজনক আবদ্ধ কৰে।

সন্দেহজনক বাংলাদেশী লোককেইজনৰ বয়স ১৪ বছৰৰ পৰা ৫৫ বছৰৰ ভিতৰত হ’ব। জানিব পৰা মতে তেওঁলোকে ভুৱা ভোটাৰ কার্ড আৰু পঞ্চায়তৰ পৰিচয়-পত্র লগত ৰাখিছিল। তাৎপৰ্যপূৰ্ভাৱে ইয়াৰে অধিকাংশই নিজৰ গাঁও আৰু থানাৰ নাম কব নোৱাৰিলে।

উক্ত লোককেইজন বর্তমান বৰডুমচা আৰক্ষী থানাৰ জিম্মাত থকা বুলি জানিব পৰা গৈছে।