তিনিচুকীয়া জিলা সাংবাদিক সন্থাৰ ভদ্ৰকৃষ্ণ গোস্বামী সাংবাদিকতা বঁটা ঘোষণা

তিনিচুকীয়া জিলা সাংবাদিক সন্থাৰ প্ৰতিষ্ঠাপক সভাপতি ভদ্ৰকৃষ্ণ গোস্বামীৰ সোৱঁৰণত এটি ৰাজ্যিক ভিত্তিত সাংবাদিকতা বটাঁ আগবঢ়োৱাৰ সিদ্ধান্ত গ্ৰহণ কৰা হৈছে। অসম সত্ৰ মহাসভাৰ প্ৰাক্তন সভাপতি তথা জকাই সত্ৰৰ সত্ৰাধিকাৰ গোস্বামীৰ সোঁৱৰণত এই বটাঁটি প্ৰতি দুবছৰৰ মূৰে মূৰে সন্থাৰ দ্বি বাৰ্ষিক অধিৱেশনত সাংবাদিকতাৰ ক্ষেত্ৰত বিশেষ বৰঙণি আগবঢ়োৱা এগৰাকী সাংবাদিকক আগবঢ়োৱা হ’ব।

দেওবাৰে মাৰ্ঘেৰিটা সাংবাদিক সংস্থাৰ উদ্যোগত মাৰ্ঘেৰিটাস্থিত হোটেল ৰয়েল ট্ৰিটৰ সভাকক্ষত অনুষ্ঠিত তিনিচুকীয়া জিলা সাংবাদিক সন্থাৰ এখনি কাৰ্যনিৰ্বাহক সভাত এই প্ৰস্তাৱ  গ্ৰহণ কৰা হয়।

জিলা সাংবাদিক সন্থাৰ সভাপতি অনুজ কলিতাৰ পৌৰোহিত্যত অনুষ্ঠিত সভা খনত ৰাজ্যৰ সত্ৰীয়া সংস্কৃতিৰ সাধক আৰু জিলাখনৰ সাংবাদিকতা ক্ষেত্ৰখনৰ অন্যতম বাটকটীয়া গোস্বামীৰ জীৱনকৃতিৰ সম্পৰ্কে মনোজ দত্ত কমল তালুকদাৰ ডঃ ঋষি দাস শান্তনু গোস্বামী আদিকে ধৰি  বিভিন্ন জনে আভাস দিয়ে।

সন্থাৰ সাধাৰণ সম্পাদক মনোৰঞ্জন দাসে  উদ্দেশ্য বাখ্যা কৰা সভাখনত ডিগবৈ প্ৰেছ ক্লাৱৰ অভ্যৰ্থনাত সদ্য প্ৰয়াত ভদ্ৰকৃষ্ণ গোস্বামীৰ সোঁৱৰণত এটি স্মৃতিচাৰণ অনুষ্ঠান ৩০ ছেপ্তেম্বৰত উদযাপন কৰাৰ সিদ্ধান্ত গ্ৰহণ কৰা হয়। এই স্মৃতিচাৰণ অনুষ্ঠানত ইতিমধ্যে ৰাজ্যৰ এগৰাকী বিশিষ্ট সাংবাদিক সমুদ্ৰ গুপ্ত কাশ্যপে অংশগ্ৰহণ কৰাৰ নিশ্চয়তা প্ৰদান কৰিছে।

উক্ত অনুষ্ঠানতে উন্মোচন কৰিব পৰাকৈ এখনি তথ্য সমৃদ্ধ স্মাৰক গ্ৰন্থ প্ৰকাশৰ সিদ্ধান্ত গ্ৰহণ কৰি ৰাণাজ্যোতি নেওগ আৰু অৰূপ কলিতাক সম্পাদকৰ দ্বায়িত্ব অৰ্পণ কৰি সভাই প্ৰস্তাৱ গ্ৰহণ কৰে। উক্ত সভাখনত মাৰ্ঘেৰিটা সাংবাদিক সংস্থাৰ অভ্যৰ্থনাত ২০১৯ ত অনুষ্ঠিত হ’বলগীয়া তিনিচুকীয়া জিলা সাংবাদিক সন্থাৰ দ্বি বাৰ্ষিক অধিৱেশনৰ সম্পৰ্কে আৰু ইয়াৰোপৰি জিলা সাংবাদিক সন্থাৰ সাংগঠনিক দিশৰ কেইবাটাও ওজৰ আপত্তি তথা হোৱাটছএপ গ্ৰুপ আদি বিভিন্ন বিষয়ত আলোচনা কৰা হয়। উক্ত সভাত  তিনিচুকীয়া জিলা সাংবাদিক সন্থাৰ এটি ফেচবুক একাউন্ট খোলাৰ সিদ্ধান্ত গ্ৰহণ কৰি মানস প্ৰতিম গগৈক তত্বাবধায়কৰ দ্বায়িত্ব অৰ্পণ কৰা হয় ।

সভাৰ আৰম্ভণিতে জিলা সভাপতিকে মুখ্য কৰি নেতৃবৃন্দক মাৰ্ঘেৰিটা সাংবাদিক সংস্থাৰ হৈ প্ৰশান্ত চেতিয়া ফাইজুৰ ৰহমান আৰু মানস প্ৰতিম গগৈয়ে সম্বৰ্ধনা জ্ঞাপন কৰে। সভাখনত উপস্থিত থাকি মাৰ্ঘেৰিটা সাংবাদিক সংস্থা আৰু ডিগবৈ প্ৰেছ ক্লাৱৰ সভাপতি ক্ৰমে ৰাম প্ৰসাদ আম্বেদকাৰ আৰু ৰমণী বুঢ়াগোঁহাইয়ে বিভিন্ন পৰামৰ্শ আগবঢ়ায় ।