ত্ৰিপুৰা নিৰ্বাচন আয়োগ সম্পূৰ্ণ সাজু হৈ উঠিছে বিধানসভা নিৰ্বাচনলৈ

বৃহস্পতিবাৰে এক সংবাদমেল সম্বোধন কৰি ৰাষ্ট্ৰীয় নিৰ্বাচন আয়োগে ১৮ ফেব্ৰুৱাৰীত ত্ৰিপুৰাত নিৰ্বাচন অনুষ্ঠিত হ’ব বুলি জানিবলৈ দিয়ে। ইয়াৰ পিছতে ত্ৰিপুৰা নিৰ্বাচন আয়োগৰ মুখ্য নিৰ্বাচনী বিষয়া শ্ৰীৰাম তৰীকান্তই ৰাজ্যখনত নিকা আৰু শান্তিপূৰ্ণ নিৰ্বাচন অনুষ্ঠিত কৰিবলৈ সমপূৰ্ণ সাজু বুলি এখন সংবাদমেলৰ জৰিয়তে মন্তব্য কৰে।

নিৰ্বাচনী দিন ঘোষণাৰ পূৰ্বে নিৰ্বাচনী আয়োগৰ উপ নিৰ্বাচন আয়ুক্ত সুদীপ জৈনে দুদিনীয়া উত্তৰ-পূব ভ্ৰমণসূচীৰ মাজেৰে ত্ৰিপুৰা নিৰ্বাচনৰ প্ৰস্তুতি সম্পৰ্কে বুজ লয়। এই ভ্ৰমণসূচীতে ৰাজ্যখনৰ বিভিন্ন জিলা ম্যাজিষ্ট্ৰেটৰ সাতেও আলোচনাত ভাগ লয়। বৃহস্পতিবাৰে আগৰতলাত আয়োজিত সংবাদমেলত এই কথা জানিবলৈ দিয়ে ৰাজ্যিক নিৰ্বাচনী আয়োগৰ মুখ্য নিৰ্বাচনী বিষয়াজনে।

ৰাজ্যখনত দীৰ্ঘদিনে চলি অহা বিজেপি আৰু শাসনাধিষ্ঠ চিপিআই(এম)ৰ মাজত তীব্ৰ বাক-বিতণ্ডাৰ ফলত  নিৰ্বাচনী বতাহ গৰম হৈ থকা বাবে ৰাজ্যখনৰ নিৰাপত্তা দিশ তথা সকলো জিলাতে শান্তিপূৰ্ণ নিৰ্বাচন অনুষ্ঠিত কৰাৰ বাবে চালি জাৰি চোৱাৰ বাবে উপ নিৰ্বাচন আয়ুক্তও পৰৱৰ্তী সময়ত ৰাজ্যখনলৈ আহিব।

ভোটাৰে ভোটদান সাব্যস্ত কৰাৰ বাবে ৰাজ্যিক আয়োগৰ ফালৰ পৰা যি ধৰণৰ প্ৰস্তুতিৰ দৰকাৰ সেয়া সকলো সম্পূৰ্ণ হৈ উঠা বুলিও সংবাদমেলত প্ৰকাশ কৰে।

নিৰ্বাচন সূচাৰুৰূপে পৰিচালনা কৰাৰ বাবে পৰ্যাপ্ত পৰিমানৰ সাধাৰণ পৰ্যবেক্ষক, ব্যয় পৰ্যবেক্ষক আৰু নিৰাপত্তা পৰ্যবেক্ষক ৰাষ্ট্ৰীয় নিৰ্বাচন আয়োগে অতি শীঘ্ৰে প্ৰেৰণ কৰিব বুলিও শ্ৰীৰাম তৰীকান্তই জানিবলৈ দিয়ে।

‘ত্ৰিপুৰা নিৰ্বাচনৰ সময়ত ৰাজ্যখনত যাতে কোনো ধৰণৰ অপ্ৰীতিমূলক পৰিস্থিতিৰ উদ্ভৱ নহয় তাৰ প্ৰতি লক্ষ্য ৰাখি অৰ্ধ সামৰিক বাহিনীৰ ৩০০টা কোম্পানী মোতায়েন কৰা হ’ব। তদুপৰি সকলো ভোটকেন্দ্ৰতে সুৰক্ষাৰ দায়িত্বত কেন্দ্ৰীয় সশস্ত্ৰ পুলিচ বাহিনীক মোতায়েন কৰিবলৈ সকলো ৰাজনৈতিক দলে অনুৰোধ কৰিছে’, সদৰী কৰে মুখ্য নিৰ্বাচনী বিষয়া জনে।

আনহাতে ৰাজ্যখনত কেন্দ্ৰীয় সামৰিক বাহিনীৰ ২৫টা গোটক সুৰক্ষাৰ স্বাৰ্থত তথা নিৰ্বাচন সুকলমে চলি যোৱাৰ বাবে ইতিমধ্যে নিয়োজিত কৰা হৈছে।

ত্ৰিপুৰা বিধানসভা নিৰ্বাচনৰ প্ৰতি লক্ষ্য ৰাখি ৰাজ্যখনত কোনো হিংসাত্মক তথা কূটাঘাটমূলক কাৰ্য সংঘটিত কৰিব নোৱাৰাৰ বাবে নিৰাপত্তামূলক ব্যৱস্থা অধিক কটকটীয়া কৰি তোলা পৰিলক্ষিত হৈছে।

আনহাতে নিৰ্বাচন আয়োগে ঘোষণা কৰা নিৰ্বাচনৰ দিনক লৈ সকলো ৰাজনৈতিক দলে সন্তুষ্টি প্ৰকাশ কৰা দেখা গৈছে।

নিৰ্বাচন আয়োগে প্ৰকাশ কৰা অনুসৰি জানুৱাৰিৰ ২৪ৰ পৰা ৩১ জানুৱাৰিৰ ভিতৰত নিৰ্বাচনত প্ৰতিদ্বণ্ডিতা কৰিব বিছৰা লোকে মনোনয়ন পত্ৰ দাখিল কৰিব পাৰিব। মনোনয়ন পত্ৰ সমূহ ফেব্ৰুৱাৰিৰ ১ তাৰিখে পৰীক্ষা নিৰীক্ষা চলোৱা হ’ব আৰু মনোনয়ন প্ৰত্যাহাৰৰ শেষ সময় হ’ল ৩ ফেব্ৰুৱাৰি। উল্লেখযোগ্য যে ত্ৰিপুৰা নিৰ্বাচনৰ ফলাফল ৩ মাৰ্চত ঘোষণা কৰা হ’ব।