দলংঘাটত বিনামূলীয়া ৰন্ধন গেছ-অন্ন সুৰক্ষা ৰেচন কাৰ্ড বিতৰণ বিধায়িকা আঙুৰলতাৰ

বটদ্ৰৱা বিধানসভা সমষ্টিৰ অন্তৰ্গত দলংঘাটৰ গোপাল ঘাট ৰাজহুৱা ভৱনত দেওবাৰে অনুষ্ঠিত এক বিশেষ অনুষ্ঠানত প্ৰধানমন্ত্ৰী উজ্জ্বলা যোজনাৰ অধীনত বিনামূলীয়া ৰন্ধন গেছ সংযোগ আৰু মূখ্যমন্ত্ৰীৰ অন্ন সুৰক্ষাৰ আঁচনিৰ ৰেচন কাৰ্ড সমূহ বিতৰণ কৰা হয়।

দলংঘাট মণ্ডল বিজেপিৰ উদ্যোগত আয়োজিত অনুষ্ঠানটিত সমষ্টিটোৰ অন্তৰ্গত পাঘালী, বৰচিলা আৰু শিলপুখুৰী গাঁও পঞ্চায়তৰ প্ৰায় দুই শতাধিক মহিলা হিতাধিকাৰীৰ মাজত ৰন্ধন গেছ আৰু প্ৰায় সাত শতাধিক লোকৰ মাজত মুখ্যমন্ত্ৰীৰ অন্ন সুৰক্ষা আঁচনিৰ ৰেচন কাৰ্ডসমূহ বিতৰণ কৰে বটদ্ৰৱাৰ বিধায়িকা আঙুৰলতা ডেকাই।

এই অনুষ্ঠানতে উক্ত পঞ্চায়তৰ অন্তৰ্গত সদ্যঘোষিত হাইস্কুল শিক্ষান্ত পৰীক্ষা আৰু উচ্চতৰ মাধ্যমিক চূড়ান্ত পৰীক্ষাত সুখ্যাতিৰে উত্তীৰ্ণ হোৱা ছাত্ৰ-ছাত্ৰীসকলক বিশেষভাৱে সম্বৰ্ধনা জনোৱা হয়। তদুপলক্ষে আয়োজিত সভাত কলিয়াবৰ জিলা বিজেপিৰ সভাপতি অতুল পাটৰ, দলংঘাট মণ্ডল বিজেপিৰ সভাপতি যজ্ঞেশ্বৰ বৰা, মণ্ডল বিজেপিৰ বিষয়ববীয়া সহিতে কেইবা শতাধিক ৰাইজ উপস্থিত থাকে।