ধুবুৰীত নেতাই ধুবুনী আৰু বেউলা-লক্ষীন্দৰৰ আৱক্ষ মূৰ্তি উন্মোচন
অসম পৰ্যটন উন্নয়ন নিগমে নিৰ্মাণ কৰি উলিওৱা নেতাই ধুবুনী আৰু বেউলা লক্ষীন্দৰৰ মূৰ্তি শুকুৰবাৰে আনুষ্ঠআনিকভাৱে শুভ উদ্বোধন কৰে পৰ্যটন উন্নয়ন নিগমৰ অধ্যক্ষ জয়ন্ত মল্ল বৰুৱাই। অসম পৰ্যটন নিগমে প্ৰায় ১১লাখ টকা ব্যয় কৰি ধুবুৰীৰ ধুবুনী উদ্যানত নিৰ্মাণ কৰি উলিয়াইছে এই প্ৰতিমূৰ্তি।
শুকুৰবাৰে ধুবুৰীৰ নেতাই ধুবুনী উদ্যানত জয়ন্ত মল্ল বৰুৱাই মূৰ্তি উন্মোচন কৰাৰ পাছতেই অনুষ্ঠিত হোৱা মুকলি সভাত কয়- ‘ধুবুৰীৰ ইতিহাস নতুন প্ৰজন্মই হয়তো নাজানে। ধুবুৰীত বহু ঐতিহাসিক স্থান সিঁচৰিত হৈ আছে। সেয়ে পৰ্যটনৰ ক্ষেত্ৰত এই জিলাখনে অধিক অগ্ৰণী ভূমিকা গ্ৰহণ কৰিব পাৰে’।
‘ইয়াৰ উপৰি অসম উন্নয়ন নিগমে ৰাজ্যৰ ঐতিহাসিক স্থান সমূহ বিদেশী পৰ্যটকৰ বাবে আকৰ্ষণীয় কৰাৰ চেষ্টা চলাই আছে। আজিৰ পৰা কিছু বছৰ পূৰ্বে ধুবুৰীৰ মান বহু পৰিমানে উচ্চ আছিল যদিও এতিয়া সেই মান বহু পৰিমানে হ্ৰাস পাইছে। কিন্তু পৰ্যটন নিগমে দুবুৰীৰ পৰ্যটনস্থলী সমূহক উন্নয়ন কৰি প্ৰচাৰ-প্ৰসাৰত গুৰুত্ব দিছে’। এই মন্তব্য জয়ন্ত মল্ল বৰুৱাৰ।
ইয়াৰ উপৰি নেতাই ধুবুনী, গুৰু ত্যাগ বাহাদুৰ সিং চাহিব আদিৰ ব্যক্তিত্ব সমাজ তথা নতুন প্ৰজন্মৰ বাবে আদৰ্শ হৈ ৰ’ব বুলিও বৰুৱাই উল্লেখ কৰে।
আনহাতে ধুবুৰী জিলাৰ উপায়ুক্ত অনন্তলাল জ্ঞানীৰ আদৰণী ভাষণেৰে আৰম্ভ হোৱা মুকলি সভাখনত জিলা বিজেপিৰ উপ-সভাপতি দেৱময় সান্ন্যল, জিলাৰ আৰক্ষী অধীক্ষক লংনিট টেৰাং, নিৰ্বাচন বিষয়া বিস্তীৰ্ণ বৰুৱা আদি উপস্থিত থাকে। মুকলি অনুষ্ঠানৰ উদ্দেশ্য বাখ্যা কৰে জনসংযোগ বিষয়া বিকাশ শৰ্মাই।