নকল কৰাত অসুবিধা : নেপালত আৰক্ষীৰ উপস্থিতিতে পৰীক্ষাৰ্থীয়ে ভাঙিলে চি চি টি ভি কেমেৰা

নেপালত পৰীক্ষাৰ্থীয়ে ভাঙিলে চি চি টি ভি (close circuit television) কেমেৰা। চিৰাহাৰ ব্ৰেহ্মেন গৰ্চাৰি পৰীক্ষা কেন্দ্ৰত স্থাপিত কেমেৰা চলিত মাধ্যমিক পৰীক্ষাত অৱতীৰ্ণ পৰীক্ষাৰ্থীয়ে ভাঙি পেলোৱা বুলি কাঠমাণ্ডু প’স্তে বাতৰি পৰিৱেশন কৰিছে।

পৰীক্ষা কেন্দ্ৰটোৰ মুৰব্বী ৰাজলাল ৰে’ই কোৱা মতে পৰীক্ষাত নকল কৰিব নোৱৰা বাবে পৰীক্ষাৰ্থীসকলে আৰক্ষীৰ সন্মুখতে ৬ টা কেমেৰা ভাঙি আৰু তাঁৰবোৰ ছিঙি পেলায়।

আনহাতে পৰীক্ষা কেন্দ্ৰটোৰ দায়িত্বত থকা আৰক্ষী পৰিদৰ্শক যোগেশ্বৰ ৰাউতে কয় যে কেন্দ্ৰটোৰ মূল প্ৰৱেশদ্বাৰত পৰীক্ষাৰ্থীসকলৰ তালাচী লৈ থকা বাবে তেওঁলোকে চি চি টি ভি কেমেৰা ভঙাৰ কথা পিছতহে গম পায়।

পৰীক্ষাটো নিকাকৈ অনুষ্ঠিত কৰা বাবে ৱাৰ্ড অধ্যক্ষ গণেশ চৌধুৰীয়ে ৬০ হাজাৰ টকা ব্যয় কৰি কেমেৰাসমূহ স্থাপন কৰিছিল।

‘চি চি টি ভি কেমেৰাসমূহ আৰক্ষীৰ সন্মুখতে ভাঙিছিল’ বুলি উল্লেখ কৰি অধ্যক্ষ চৌধুৰীয়ে কয়, ‘পৰীক্ষাবোৰ কিদৰে অনুষ্ঠিত হয় সেই কথা এই ঘটনাই আমাক জানিবলৈ দিলে।’