নাগালেণ্ডত আছাম ৰাইফলছৰ অভিযানত ধৰা পৰিল ৩ দুৰ্ধৰ্ষ এনডিএফবি(সং) কেডাৰ

সন্ত্ৰাসবাদী দমনৰ উদ্দেশ্যে নাগালেণ্ডত আছাম ৰাইফলছে চলোৱা এক অভিযানত এনডিএফবি (সং)ৰ ৩ দুৰ্ধৰ্ষ কেডাৰ ধৰা পৰাৰ বাতৰি পোৱা গৈছে।

আছাম ৰাইফলছে প্ৰকাশ কৰা এক প্ৰেছ বিবৃতি অনুসৰি ধৃত এনডিএফবি(সং) কেডাৰ তিনিজনে প্ৰাথমিকভাৱে নামনি অসমত সক্ৰিয় হৈ আছিল।

চোৰাংচোৱাৰ পৰা লাভ কৰা নিৰ্দিষ্ট তথ্যৰ ভিত্তিত আছাম ৰাইফলছে শুকুৰবাৰে নাগালেণ্ডৰ ৰাজধানী ডিমাপুৰৰ ঝৰ্ণাপানীত চলোৱা অভিযানতে এনডিএফবি(সং) কেডাৰকেইজনক আটক কৰে।

আটকাধীন এনডিএফবি(সং)ৰ কেডাৰ তিনিজন হৈছে ক্ৰমে ছোমাৰ বসুমতাৰী (৩০), নিপেন নাৰ্জাৰী (৩০) আৰু ৰাজেশ নাৰ্জাৰী (২৩)। ধৃত তিনিওজনৰ ঘৰ নামনি অসমৰ কোকৰাঝাৰ আৰু চিৰাং জিলাত বুলি প্ৰকাশ কৰিছে আছাম ৰাইফলছৰ সূত্ৰই।আনহাতে ধৃত এনডিএফবি(সং) কেডাৰ কেইজনৰ পৰা আছাম ৰাইফলছে এটা পইণ্ট ৩২ কেলিবাৰ পিষ্টল আৰু চাৰি জাঁই সক্ৰিয় গুলী উদ্ধাৰ কৰিবলৈ সক্ষম হৈছে।

ধৃত আটাইকেইগৰাকীৰ বিৰুদ্ধে ডিমাপুৰ আৰক্ষীয়ে গোচৰ ৰুজু কৰিছে বুলি জানিব পৰা গৈছে। সম্প্ৰতি ঘটনাটোৱে তীব্ৰ প্ৰতিক্ৰিয়াৰ সৃষ্ঠি কৰা পৰিলক্ষিত হৈছে।